Governu ho Parlamentu Nasional Votasaun Proposta OJE 2020 iha debate faze Espesialidade, iha sala plenáriu PN, kuarta (07/10). Imajen Tatoli/Egas Cristovão

DILI, 07 outubru 2020 (TATOLI)—Parlamentu Nasionál aprova ona proposta Orsamentu Jerál Estadu (OJE) hosi Ministériu Agrilkutura no Peska (MAP) montante $7.265,085 ho rezultadu votasaun a-favór 44, kontra 10 no abstensaun 11.

Hosi montante orsamentu $7.265,085 komposta hosi saláriu no vensimentu millaun $3.471,102, bens millaun $3.567,543, kapitál minór $ 116,445 no kapitál dezenvolvimentu $ 109,997.

“Ho nune’e orsamentu ba Ministériu Agrikultura no Peska pasa,”  Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi debate espesialidade loron datoluk iha plenária Parlamentu Nasionál, kuarta ne’e.

Entretantu Ministru Agrikultura no Peska, Pedro dos Reis, hateten hosi orsamentu millaun $7-resin ne’e ezekuta ona millaun $5-resin no resta orsamentu hela millaun $2-resin.

“Orsamentu 2020 nian ne’e karik aprova sei selu ba dívida sira-ne’ebé mak iha. Ha’u hanoin dívida ne’e surat tahan naruk tebes, manutensaun, ha’u atu esplika mais ha’u la lembra. Maibé, dívida barak tebes,” dehan Ministru Pedro dos Reis.

Ministru Agrkultura no Peska ne’e sei tenta halo esforsu hodi ezekuta hahú hosi outubru, novembru no dezembru.

“Ami-nia ezekusaun kuaze atinje 82%. Tanba ne’e, hela de’it milaun $2 de’it ona. Orsamentu ne’e halo kontinuasuan ba atividade sira-ne’ebé durante la’o iha Dotasaun Orsamentu Temporaria nia laran,” nia dehan.

Iha livru planu asaun ne’e dekreve medida prinsipál setoriál hosi MAP nian mak promove hodi aumenta sustentável produsaun no produtividade hodi halo diversifikasaun ba produsaun agríkola, konstribui hodi mellora asesu ba merkadu no valór akresentada sira, asegura jestaun no prezervasaun rekursu naturál sira

Nune’e mós implementa polítika jéneru, promove boa governasaun no jestaun institusionál ne’ebé tutela ba ministériu refere, fortalese instituisaun no eleva kapasidade rekursu umanu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here