Governu ho Parlamentu Nasional Votasaun Proposta OJE 2020 iha debate faze Espesialidade, iha sala plenáriu PN, segunda (05/10). Imajen Tatoli/Egas Cristovão

DILI, 07 outubru 2020 (TATOLI)— Parlamentu Nasionál iha debate faze espesialidade loron datoluk  aprova ona orsamentu hosi Ministériu ba Asuntu Kombatente Libertasaun Nasionál (MACLN-sigla portugés) no Ministériu Planeamentu no Ordenamentu (MPO).

Orsamentu hosi Ministériu ba Asuntu Kombatente Libertasaun Nasionál hamutuk $98,768,183 ba tinan fiskál 2020, inklui montante orsamentu $93,298,510 ne’ebé destinada ba pagamentu pensaun sira ba kombatente libertasaun nasionál liuhosi rúbrika ransferénsia públika.

Hosi montante $98,768,183 ne’e fahe ba saláriu no vensimentu $555,564, bens (sasán) no servisu $3,829,658, kapitál minór $434,451, kapitál dezenvolvimentu $650,000 no kapitál dezenvolvimentu $93,298,510.

Hosi montante orsamentu $98,768,183 ne’e ezekuta ona balun hahú hosi janeiru to’o setembru. Entretantu resta orsamentu sei hahú ezekuta hahú hosi outubru, novembru no dezembru tinan 2020.

Montante orsamentu ne’e Parlamentu Nasionál aprova ona ho rezultadu votasaun ba orsamentu MACLN a-favór 44, kontra 0 no abstensaun 19

Ministériu ba Asuntu Kombatente Libertasaun Nasionál (MACLN-sigla portugés) lideradu Júlio Sarmento “Meta Malik” fó prioridade pagamentu pensaun ba veteranu sira no apoia kombatente halo tratamentu iha estranjeiru durante tinan fiskál 2020.

Promove no asegura kontinuidade inisiativa rekoñesimentu no glorifikasaun libertasaun nasionál no erói sira. Fó kontinuidade pagamentu pensaun ba veteranu sira, bolsa estudu no apoia médiku iha estranjeiru ba kombatente sira

Medida prinsipál seluk hosi ministériu refere mak oferese kaixaun/urna funerária ba serimónia fúnebre restus mortais mártir sira no organiza enterros (penguburan) iha Jardín erói Metinaro.

Nune’e mós organiza serimónia komemorativa de efemérides liga ba kombatente libertasaun nasionál no istória foun nasaun nian.

Ministériu ba Asuntu Kombatente Libertasaun Nasionál  ne’ebé lidera hosi Júlio Sarmento “Meta Malik” ne’e sei garante funsionamentu Konsellu Kombatente Libertasaun Nasionál (CCLN-sigla portugés), dezenvolve konstrusaun jardín erói no semitériu espesiál ba kombatente libertasaun nasionál sira.

Medida prinsipál hosi ministériu refere kontinua dezenvolve boa governasaun, jestaun institusionál servisu tomak ministériu nian, fortalese instituisaun no eleva kapasidade rekursu umanu.

Iha orsamentu seluk, Parlamentu Nasionál mós aprova ona orsamentu ba Ministériu Planeamentu no Ordenamentu hamutuk millaun $14.094 kompostu hosi saláriu no vensimentu rihun $143, bens no servisu millaun $3.394 no kapitál dezenvolvimentu millaun $10.558.

Hosi montante orsamentu millaun $14.094 ne’e koloka ba Gabinete Ministru rihun $678, Dirasaun Jerál Jestaun Administrativa rihun $54, Gabinete Jurídiku rihun $156, Dirasaun Nasionál Jestaun Rekursu Umanu rihun $120, Gabinete Inspesaun no Auditoria Interna rihun $28, Dirasaun Nasionál Administrasaun, Finansa no Aprovizionamentu rihun $461 no Ajénsia Dezenvolvimentu Nasionál millaun $12.597.

Orsamentu hosi Ministériu Planeamentu no Ordenamentu aprova  ho rezultadu votasaun a-favór 44, kontra 7 no abstensaun 13.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here