Governu defende Proposta OJE 2020 iha debate faze espesialidade loron datoluk, iha sala plenáriu, kuarta (07/10). Imajen Tatoli/Egas Cristovão

DILI, 07 outubru 2020 (TATOLI)—Liuhosi diskusaun proposta Orsamentu Jerál Estadu (OJE) iha faze espesialidade ba loron datoluk iha sala plenáriu kuarta ne’e, Parlamentu Nasionál (PN) aprova ona orsamentu ba Institutu Nasionál Dezenvolvimentu mão-de-obra (INDMO) iha espesialidade ho montante $246.737, ho rezultadu votasaun a-favór 44, kontra 0, no abstesaun 21.

Alokasaun orsamentu ba institutu ne’e fahe ba kategoria saláriu no vensimentu $31.736, bens no servisu $215.001, kapitál menór, kapitál dezenvolvimentu no transferénsia públika laiha alokasaun.

Bazeia ba planu anuál, INDMO tau prioridade governasaun bein estár sosiál, protesaun sivíl no sidadania, edukasaun no formasaun.

Hosi prioridade governasaun ne’e hamosu medida prinsipál lima maka hanesan asegura rejistu sentru akreditasaun no re-akreditasaun, no sentru formasaun, aumenta kualidade mão-de-obra produtivu no kompetetiva hodi realiza nesesida industria akordu ho merkadu traballu.

Nune’e mós, akompaña no garante kualidade mão-de-obra liuhosi monitorizasaun no avaliasaun,  introdús papél INDMO ba promosaun (mídia imprensa no mídia dijitál), promove boa governasaun no jestaun institusionál, no fortalese kapasidade rekursu umanu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here