Governu defende Proposta OJE 2020 iha debate faze espesialidade loron datoluk, iha sala plenáriu, kuarta (07/10). Imajen Tatoli/Egas Cristovão

DILI, 07 outubru 2020 (TATOLI)—Iha diskusaun faze jeneralidade loron datoluk ba Orsamentu Jerál Estadu (OJE) 2020, Parlamentu Nasionál (PN) aprova ona orsamentu ba Ministériu Obra Públika (MOP) ho votu a-favór 43, kontra 9 no abtensaun  12.

“Orsamentu ba Ministériu Obra Públika aprovadu”, deklara Prezidente Parlamentu Nasionál, Aniceto Guterres, iha sala plenáriu, kuarta ne’e.

Alokasaun orsamentu ba MOP hamutuk $195.423.435, ne’ebé fahe ba kategoria saláriu no vensimentu $5,022,471, bens no servisu $182.877.129, kapitál menór $2.523.835, kapitál dezenvolvimentu millaun $5, no laiha transferénsia públika.

Osan prevee ba gabinete Ministru Obra Públika hamutuk $679.000, gabinete Vise Ministru Obra Públik $294.000.

Unidade servisu jurídiku  $6.000, gabinete inspesaun no auditoria $81.000, unidade planeamentu  $79.000, diresaun jerál administrasaun finansa $366.000, diresaun nasionál administrasaun no jestaun patrimoniu millaun $1,615, diresaun nasionál orsamentu no finansa millaun $17,990, diresaun nasionál aprovizionamentu $340.000, diresaun nasionál rekursu umanu millaun $1,496, diresaun jerál obra públika $41.000, diresaun nasionál peskija no dezenvolvimentu obra públika $132.000.

Diresaun nasionál estrada, ponte no kotrolu de cheia millaun $5,738, diresaun jerál eletrisidade $150.000, diresaun nasionál produsaun enerjia elétrika $338.000, diresaun nasionál distribuisaun enerjia elétrika no apoiu konsumidor millaun $1,383, diresaun nasionál apoiu konsumidór $742.000, diresaun nasionál transmisaun enerjia elétrika millaun $1,103.

Diresaun nasionál enerjia renovável $132.000, diresaun nasionál peskiza no dezenvolvimentu eletrisidade $112.000, diresaun jerál água no saneamentu $73.000, diresaun nasionál servisu águ millaun $3,501, diresaun nasionál jestaun no rekursu água $184.000, diresaun nasionál servisu saneamentu báziku $191.000, diresaun jerál abitasaun no planeamentu $87.000, diresaun nasionál abitasaun $5.000, diresaun nasionál edifikasaun $198.000.

Provizaun despeza kombustível no manutensaun jeradór no liña transmisaun millaun $158,357.

Iha OJE 2020 ba MOP iha proposta ida mai hosi deputadu bankada opozisaun sira ho objetivu propoin atu diminui montante $26.000 hosi kategoria despeza bens no servisu iha diresaun nasionál estrada, ponte no kontrolu de cheia alokadu ba viajem estranjeiru ho razaun tempu ba ezekusaun ba atividade sira ne’e limitadu ho no surtu pandemia COVID-19 la permite atu halo viajen ba estranjeiru.

Maski nune’e, proposta ne’e la pasa no Ministru Obra Públika, Salvador Eugênio Soares dos Reis Pires, hateten iha orsamentu ne’ebé propoin iha bens no servisu ba viajen estranjeiru ne’e hanesan orsamentu ne’ebé selu tiha ona liuhosi Dotasaun Orsamentu Temoporáriu (DOT) ne’ebé maka atu selu viajen sira ne’ebé hala’o bazeia ba nota entendimentu ho kontra partida hanesan fó fórmasaun staff tékniku sira.

“Husu atu mantein nafatin orsamentu refere no bainhira osan ne’e promulgadu automátikamente hetan redusaun ba orsamentu MOP nian,” nia dehan.

Iha tinan 2020 MOP prioritiza medida prinsipál ualu hodi garante governasaun di’ak.

Bazeia ba planu asaun anuál (livru 2), prioridade MOP maka bein estar sosiál, protesaun sosiál no sidadania, bem estar sosiál (água potável no saneamentu báziku, abitasaun), inkulzaun, protesaun no solidariedade sosiál (inan no labarik), sidadania (partisipasaun, patriotism, no nasionalismu), mellora konektividade nasionál, ne’ebé sei investe iha área xave tolu maka hanesan infraestutura, lojíztika, no prioridade seluk maka kontrola kualidade ba obra konstrusaun sivíl no obra públika, boa governasaun no jestaun institusionál.

Hosi prioridade governasaun ne’e hamosu medida prinsipál setór ualu hosi MOP iha tinan 2020.

Medida prinsipál ne’e maka prosegue ho konstrusaun, manutensaun no jestaun ba estrada no ponte iha rede nasionál, inkluindu estrada rejionál no rurál ne’ebé liga produtivu ba merkadu.

Implementa programa kontrola inundasaun no situasaun emerjénsia, ho forma asegura konektividade iha teritóriu nasionál, introduz melloria sistema abastesementu bee inklui konstrusaun no reabilitasaun, ba saneamentu iha área urbana no rurál, sentru saúde no eskola, asegura no normalidade abastesementu bee hodi benefisia sidadaun sira.

Reforma kuadru legál abastesementu bee no jestaun rekursu ídriku, garante kontinuidade programa eletrifikasaun nível nasionál no instala liña distribuisaun, introdús no melloria sistema produsaun no fornesementu enerjia elétrika forma viável no sustentável, garante kontrola kualidade konstusaun sivíl no obra públika no ikus liu promove boa governasaun no jestaun institusionál.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here