Logotipu PDHJ

DILI, 07 outubru 2020 (TATOLI)-Parlamentu Nasionál (PN), ohin, liuhosi diskusaun no aprovasaun iha espesialidade, aprova (pasa) ona alokasaun orsamentu ho montante $1,155,894 ba Provedoria Direitu Umanu no Justisa (PDHJ) iha Orsamentu Jerál Estadu (OJE) 2020.

“Rezultadu votasaun a-favor 44, kontra 0 no abstensaun 20. Ho nune’e orsamentu ba Provedoria  Direitu Umanu no  Justisa  pasa,” deklara Prezidente Parlamentu Nasionál, Aniceto Longuinhos Gueterres, iha ámbitu diskusaun orsamentu Jerál Estadu (OJE) 2020 iha faze espesialidade iha Parlamentu Nasionál.

Orsamentu ba Provedoria  Direitu Umanu no  Justisa  $1,155,894  ne’e kobre ba  Saláriu vensimentu $741,217, bens servisu $ 414,677, kapitál menór laiha (0), kapitál dezenvolvimentu  $571,616  no transferénsia públika laiha (0).

Provedoria Direitu Umanu no Justisa (PDHJ) nu’udar órgaun independente ne’ebé ho nia papél apresia no  simu keixa hosi sidadaun kontra podér públiku, bele verifika konformidade ba auto tuir lei, nune’e mós oinsá halo prevensaun no inisia prosesu hotu ba reparasaun injustisa.

PDHJ órgaun independente, la sujeita  diresaun, kontrolu ka influensia  ba kualkér  ema ka autoridade. PDHJ  ezerse  nia funsaun iha ámbitu  atividade podér públiku hanesan iha Governu, Polísia Nasionál Timor-Leste (PNTL), Servisu Prizionais  no FALINTIL-Forsa  Defeza Timor-Leste (Artigu 3º e 5º da Lei n.º 7/2004, de 20 de maio).

Tuir  dokumentu ne’ebé deskreve Planu Asaun Nasionál  Anuál   livru 2 medida prinsipál setoriál    ba 2020 PDHJ fó prioridade, superviziona funsionamentu  ba podér públiku, Submete ba Governu, no Parlamentu Nasionál ka    kualkér  orgaun kompetente sira seluk, ho baze konsultiva, paresér, rekomendasaun, proposta  no relatóriu   kona-ba kualkér matéria relativamente  promosaun no protesaun direitu umanu no boa governasaun.

Fiskaliza no  verifika kompatibilidade  kualkér lei, regulamentu, despaixu administrativu, polítika no prátika iha vigor ka ba kualkér proposta lejizlativa  ho direitu internasionál kostumeiru no tratadu vijente  iha matéria direitu umanu,

Rekomenda adosaun lejizlasaun foun no inisia alterasaun lejizlasaun  iha vigor no adosaun ka revizaun medida administrativu, asegura  monitorizasaun  ba asuntu  relasiona  ho direitu umanu ho boa governasaun, investiga  ba  kazu violasaun ba direitu hirak ne’e,  promove   asaun formasaun  no kapasitasaun téknika profisionál, promove boa governasaun jestaun  institusionál, fortalese kapasidade rekursu umanu.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here