Polísia Unidade Tránzitu hatún hela motor hirak ne’ebé Polísia sira halo apreensaun iha area Palacio do Governu nian, tersa (02/06/2020). Imajen Tatoli/Dok.

DILI, 07 outubru 2020 (TATOLI)- Komandu Jerál Polísia Nasionál Timor-Leste (PNTL) servisu hamutuk ho Embaixada Nova Zelándia iha Timor-Leste realiza semináriu nasionál, hahú ohin to’o kinta aban, hodi kapasita membru Polísia Departamentu Nasionál Tránzitu no Seguransa Rodoviáriu (DNTSR), komandante munisípiu no unidade sira hodi rezolve problema engarrafamentu iha kapitál Dili.

Portavós Komandu Jerál PNTL, Superintendente Xefe, Arnaldo de Araújo dehan, semináriu nasionál ne’e importante tebes, no hetan partisipasaun másimu hosi membru tránzitu hotu hodi rona matéria ne’ebé fahe hosi peritu sira  polísia Nova Zelándia nian kona-ba oinsá halo relatóriu servisu ida profisionál kontribui ba dezenvolvimentu PNTL.

“Semináriu ne’e ita nia peritu sira polísia Nova Zelándia fahe esperiénsia ba polísia tránzitu sira hodi halo analiza ‘Swat’ no analiza ‘Trip’, oinsá sira halo servisu di’ak, tanba ita haree ita nia sidade laran ne’e iha problema engarrafamentu, tanba ne’e sira fó formasaun oinsá buka rezolve problema sira ne’e,” dehan Portavós PNTL ba jornalista iha salaun enkontru Timor Plaza, Dili.

Ohin loron transporte públiku (karreta-motór) loroloron halo movimentu maka’as la kumpre regra tránzitu hodi hamosu engarrafamentu iha parte dadeer, loro-manas no lokraik.

“Ita nia alvu ne’e tenke rezolve engarrafamentu para karreta labele macet kleur, entaun presiza rekursu ida hodi analiza fatin sira ne’ebé mosu beibeik engarrafamentu tenke solusiona,” nia hateten.

Matéria formasaun Analiza Swat haree liu oinsá polísia halo analiza profunda kona-ba solusiona engarrafamentu no matéria Trip ne’e haree liu ba kestaun tékniku  servisu nian.

PNTL mós loroloron halo akompañamentu iha estrada públiku  sira inklui kontrola movimentu transporte públiku labele para arbiru iha estrada laran no kontrola movimentu transporte hosi CCTV ne’ebé monta ona iha estrada públiku kapitál Dili.

Sistema kontrolu ida ne’e, PNTL halo hodi minimiza mós problema asidente tráfegu iha kapitál Dili.

Formasaun ne’e hetan partisipasaun másimu hosi komandante polísia munisípiu sira ho mós Polísia Tránzitu husi 12, inklui Rejiaun Administrativu Espesiál Oe-Cusse Ambeno (RAEOA) no mós membru DNTSR.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here