Mega projetu Estádiu Munisipál Manatuto. Imajen Tatoli/Joanico de Araújo

DILI, 07 outubru 2020 (TATOLI) – Mega projetu konstrusaun Estádiu Munisipál Manatuto ne’ebé hahú iha tinan 2016 to’o agora seidauk finaliza tuir termu kontratu tanba kompañia  Obrai enfrenta krize finanseiru.

Notísia Relevante : Sekretáriu Estadu Abrão Esforsu Rezolve Estádiu Munisipál Dili no Manatuto

Maske nune’e, obra nain, Sekretaria Estadu Juventude no Desportu (SEJD) kumprimenta ba avaliasaun tékniku Ajénsia Dezenvolvimentu Nasional (ADN) hodi rekomenda katak projetu ne’e atinje ona nia ezekusaun fíziku 82%, nune’e SEJD halo ona pagamentu  60% hosi total valor orsamentu $2,000,000,00.

Diretora Administrasaun no Finansas SEJD, Maria Luisa Monteiro, hateten, SEJD halo verifikasaun ba prosesu ne’e nota katak mega projetu ne’e atrazu tanba kompañia difikuldade iha finanseiru no ema tékniku ne’ebé halo jestaun.

“Ita hatene katak ezekusaun ba mega projetu Estádiu Manatuto iha 2016 to’o agora seidauk finaliza. Tuir avaliasaun SEJD nian haree problema ne’ebé prejudika hodi la finaliza to’o ohin loron mak kompañia difikuldade finanseiru ho ema tékniku rasik atu halo jestaun ho nune’e mak prejudika ba konstrusaun ne’e la tuir nia tempu kontratu ne’ebé iha,” hateten  Diretora Maria Luisa Monteiro, hodi responde  Agência Tatoli, ohin, iha edifísiu SEJD, Leçidere, Dili.

Nia hatutan, Governu tenta nafatin atu kompañia bele finaliza konstrusaun ne’e iha tinan oin.

“Difikuldade ne’ebé mak SEJD tau hanesan konsiderasaun iha Estádiu ne’e  mak hanesan bee to’o agora seidauk rezolve, maibé servisu hamutuk la’o nafatin atu halo kanalizasaun no perfurasaun bee hodi halo instalasaun kobre ba Estádiu ne’e rasik,” nia hateten.

Nia informa, kompañia halo perfurasaun ba bee (BOQ) maibé to’o agora seidauk hetan bee, nune’e SEJD ho Servisu Agua Saneamentu (SAS)  Munisípiu Manatuto servisu hamutuk atu haree no halo kanalizasaun.

Relasiona ho item hirak ne’ebé kompañia  finaliza ona, diretora ne’e relata, kadeira, hariis fatin, servisu seluk tan kompañia halo ona, maibé tanba abandona tempu naruk nia laran prejudika ba item balu aat fila-fali ona.

“Item sira at ne’e presiza kompañia atu hadi’a fila fali. Ami ko’alia ho diretór kompañia foun ona atu haree, tanba diretór anterior ita hapara ona, entaun Diretór kompañia foin mak sei halo kontinuasaun fali ba obra ne’e no nia resik deklara katak sei finaliza fali obra ne’e hodi entrega hikas ba Governu,” nia relata.

Balansu hosi orsamentu $2,000,000,00 resin ba projetu ne’e agora daudaun hela de’it 590,000,00 mak sei iha no utiliza de’it osan ne’e rasik hodi finaliza obra refere no laiha tan adisionál.

“Bazeia ba kontratu kompañia viola tiha ona regra, maibé SEJD tenta nafatin atu bele hapara tiha kompañia anterior nia diretór, nune’e lori tiha ba KAFI mak hetan hikas aprovasaun hodi kontinua nafatin ba diretór foun ho kompañia tuan naran Obrai. Diretór foun kompromete atu finaliza obra ne’e,”  Maria Luisa Monteiro informa.

Diretór foun kompañia Obrai asina ona kontratu iha fulan hira ba no servisu tékniku iha Estádiu Manatuto lao kontinua ona.

“Ekipa tékniku hosi kompañia nian mai halo aprezentasaun darua ona ba SEJD, Obras Públika no ADN no sira mós hatama ona kalendáriu servisu katak sira sei finaliza iha novembru nia laran, entaun konserteza sei finaliza iha tinan oin. Iha tempu badak ami sei halo inspesaun ba servisu kompañia nian iha servisu fatin,” nia hakotu.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here