Arsebispu ba Arquidiocese Metropolitana Dili, Don Virgílio do Carmo da Silva, prezide misa iha sítiu Na’in-Feto Ramelau, kuarta (07/10). Imajen Tatoli/António Gonçalves

AINARO, 07 outubru 2020 (TATOLI)–Arsebispu ba Arquidiocese Metropolitana Dili, Don Virgílio do Carmo da Silva, prezide misa selebrasaun loron peregrinasaun nasionál Na’in-Feto Ramelau ba dala-23 no iha tempu hanesan selebra tinan-80 ezisténsia Dioseze Dili, iha Santuáriu, postu administrativu Hatubelico, munisípiu Ainaro.

Antes misa, peregrinu sira halo prosesaun akompaña ho orasaun hahú tuku 02:00 madrugada to’o sítiu Na’in-Feto Ramelau.

Iha omília, Don Virgílio, husu sarani sira labele tauk hasoru dezafíu no tenke iha espítitu otimismu.

Sarani sira hala’o peregrinasaun ba sítiu Na’in-Feto iha Ramelau. Imajen Tatol/António Gonçalves

“Nu’udar sarani tenke barani hasoru dezafíu maski moris sempre hasoru situasaun inserteza. Sarani tenke iha espíritu otimismu maski iha susar no terus tanba bainhira ita iha esperansa maka ita la fiar dehan Maromak mate maibé moris iha ita-nia le’et tanba ita-nia sala, ida ne’e maka esperansa sarani ninia,” tenik Arsebispu Dili, iha kinta ne’e.

Nia fó hanoin, terus no susar iha inserteza nia laran no la hatene saida maka sei akontese aban bain-rua maibé Maromak ne’e moris atu salva ema.

Biban ne’e, Amu Bispu ne’e realsa katak peregrinasaun reflete ba moris.

“Peregrinu sira tenke tau iha neon no moris iha peregrinasaun, tanba nu’udar ema la’o rai fó hanoin ba ita katak ema hotu iha peregrinasaun, ne’e reflete ba ita-nia moris iha rai. Tanba peregrinasaun só ramata bainhira ita hasoru malu ona ho Maromak,” Don Virgílio haklaken.

Arsebispu ba Arquidiocese Metropolitana Dili, Don Virgílio do Carmo da Silva, prezide misa iha sítiu Na’in-Feto Ramelau, kuarta (07/10). Imajen Tatoli/António Gonçalves

Maski tuir Amu ne’e dalabarak bainhira ita loke fuan atu rona Maromak ninia mensajen sempre hasoru dezafíu.

“Keta tauk tanba bainhira fiar metin sempre iha dalan solusiona problema. Ita loke fuan atu rona bainhira Maromak nia mensajen dala barak sempre iha dezafíu,  maibe Nia mos dehan keta tauk tanba bainhira fiar metin sempre iha dalan,” nia akresenta.

Antes sa’e ba vizita Na’in-Feto Ramelau, Amu Don Virgílio akompaña ho madre padre inklui perigrinu sira ko’a dose no loke sampaña nu’udar jestu komemora eventu importante rua.

Peregrinasaun nasionál ne’e taka ho vizita Arsebispu Dili no peregrinu sira ba ilas Na’in-Feto Ramelau no to’o iha fatin sunu lilin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here