Servidór Estadu hosi Instituisaun Estadu hala’o vizita ba Komandu Jerál PNTL. Imajen/IDN-TL

DILI, 07 outubru 2020 (TATOLI)- Diretór Instituto Defeza Nasionál Timor-Leste (IDN-TL), Capitão–de-Mar-e-Guerra, Donaciano Costa Gomes “Pedro Klamar Fuik” dehan, prosesu konstrusaun Estadu no nasaun ne’e, presiza tebes servidór Estadu hotu-hotu ninia kontribuisaun atu servisu ho domin no rigór hodi presta servisu ne’ebé kualidade no profisionál para dudu dezenvolvimentu nasaun.

Notísia Relevante : Partisipante Formasaun “Governansa no Lideransa Estratéjia” Apresia Ho IDN-TL

IDN rasik simu orientasaun hosi Primeiru-Ministru, Taur Matan Rauk, hamutuk ho  Komisaun Funsaun Públiku (CFP)  Instituto Nasionál Administrasaun Publika (INAP) no Fundu Dezenvolvimentu Kapitál Umanu (FDCH) kontinua organiza formasaun ba servidór Estadu atu hasa’e rekursu kargu xefia hosi Instituisaun Estadu hotu.

IDN no CPF apresia tebes, durante fulan ida resin, servidór Estadu hirak aprende ona matéria oin-oin ne’ebé sira hetan durante kursu hahú to’o remata.

“IDN hetan orientasaun husi Primeiru-Ministru Taur Matan Ruak. Ha’u tenta dezeña Kursu Formasaun Avansada Governansa no Lideransa Estratégika ida ne’e para bele korresponde ho ita nia realidade. Ohin, ita ultrapasa ona kursu ne’e durante fulan ida resin.  IDN louva  potensialidade ne’ebé hatudu hosi diretór nasionál sira,” dehan Pedro Klamar Fuik liuhosi mensajen ne’ebé haktuir iha komunikadu imprensa  ne’ebé Agência Tatoli asesu, ohin.

Nia dehan, servidór Estadu turma 3C ne’ebé termina ona  Kursu Formasaun Avansada Governansa no Lideransa Estratéjika importante atu implementa iha sira nia servisu loro-loron, dezenvolve instituisaun estadu.

“Primeiru-Ministru Taur Matan Ruak, preokupa ho ita nia prosesu de Konstrusaun Estadu-Nasaun. Nia haree katak, Estadu atu bele fó kontinuasaun ba objetivu nasaun nian, tenke iha oan sira ne’ebé mak serve Estadu, serve ho domin ne’ebé boot ho patriotizmu no iha nasionalizmu,” nia hateten.

Eis Komandante Komponente Navál F-FDTL ne’e hatutan, dirijente ka lider hot-hotu, tenke atualiza sira nia koñesimentu hodi akompaña nafatin mudansa hosi efeitu globalizasaun atuál akompaña nasaun barak ninia esperiénsia hodi hadi’a Timor-Leste.

“Normálmente formasaun hot-hotu iha nia objetividade katak , habelar saída mak ita hatene iha pratika servisu no ba sosiedade sira. Tanba iha  prosesu konstrusaun Estadu, ita presiza teste ita nia kapasidade,” tenik nia.

Iha fatin hanesan, reprezentante Diretór Nasionál ba kursu formasaun avansada governansa no lideransa estratéjika iha turma C, Filomena Babo hosi Sekretáriu Estadu para Igualdade no Inkluzaun  hato’o agradese bele tuir ona kursu to’o remata.

“Klase turma C mak dinámika liu, espera katak dinámika ida ne’e la’ós de’it iha ita nia atitude ne’ebé mak ita hatudu vervalmente, maibé, importante liu oinsá mak ita hatudu ita nia abilidade no koñesimentu ba matéria ne’ebé hato’o ona durante semana lima iha pratika,” nia hateten.

Lori naran kolega sira hosi turma C, Filomena Babo dehan, matéria formasaun hotu ne’ebé sira simu hosi manorin sira iha kursu formasaun avansada governansa no lideransa estratéjika   kompara ho formasaun sira ne’ebé durante ne’e sira tuir iha  rai-li’ur no rai-laran kontribui tebes ba prosesu konstrusaun Estadu.

“Ami bele dehan katak formasaun ida ne’e úniku tebetebes, no formasaun ne’ebé fanun fali ami, reflete fali atitude sira, no saída de’it mak ami aplika ba ami nia subordinadu ida durante ne’e, ami kompara ho matéria ne’ebé ami hetan iha semana lima nia laran ne’e ami hanoin katak valor tebes,” Filomena agradese.

Nia hatutan, kursu ne’e hametin lasu amizade sira ho manorin  sira  atu fahe nafatin hanoin di’ak ba malu buka rezolve dezafiu sira, hadi’a nasaun ho professional.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here