DILI, 07 outubru 2020 (TATOLI)- Komandante Jerál Polísia Nasionál Timor-Leste (PNTL), Komisáriu Faustino da Costa, kontinua halo esforsu hodi asegura orden Estadu Timor-Leste nian ba kombate atividade ilegál iha fronteira terrestre entre Timor-Leste ho Indonéziu.
Notísia Relevante : PR Lú Olo preokupa movimentasaun arte-marsiál iha fronteira terrestre
Atu konkretiza oden Estadu nian ne’e iha pratika loro-oron nian, ekipa Komandu Jerál PNTL ne’ebé lidera diretamente hosi Komisáriu Faustino da Costa, tersa ne’e, halo vizita ida ba iha Postu Integradu Unidade Patrullamentu Fronteira (UPF) nian iha liña fronteira terrestre hod i observa besik liu atividade patrullamentu Komandante UPF, João Sancho Pirres ho nia elementu sira halo iha fronteira terrestre TL-RI.
Komisáriu Faustino uza nia autoridade hanesan komandu ba instituisaun PNTL ho lema “Mantein Lei ho Orden” fó orientasaun komandu ba membru UPF sira kontinua taka metin fronteira terrestre atu evita sidadaun Timor-oan sira halo viajen ilegál ba Atambua hodi evita propagasaun surtu COVID-19.
Postu UPF sira ne’ebé Komandante Faustino no Xefe Gabinete no membru husi Seksaun Planeamentu vizita maka Postu Salele, Lela, Altu Lebos no Postu vijilánsia iha Bora, Sasa, Wefauk, no Komandu Munisípiu Covalima, Bobonaro no Kuartél UPF Batugede.
Komisáriu Fastino dehan, Prezidente Repúblika, Francisco Guterres “Lú Olo” rasik husu atu PNTL no F-FDTL servisu maka’as asegura implementasaun Estadu Emerjénsia daneen labele iha tan movimentu ilegál entre Timor-oan no Indonéziu iha fronteira terrestre.
Moras Covid-19 ne’e rasik sei hada’et nafatin iha mundu. Kalamidade foun ne’e hada’et lalais de’it hosi ema ba ema, husi rai ba rai no hamate ona ema ua’in ona iha mundu.
“Vizita servisu ba postu Unidade Patrullamentu Fronteira (UPF) hodi asegura seguransa iha fronteira no prevene movimentu ilegál,” afirma Komisáriu Faustino da Costa, liuhosi komunikadu imprensa ne’ebé Agência Tatoli asesu hosi Komandu PNTL.
Durante halo vizita, Komisáriu Faustino da Costa, alerta ba komandante polísia munisípiu, komandante unidade sira no membru hotu atu hala’o servisu maka’as liután hodi kombate movimentu ilegál iha fronteira ligadu ho atividade GAM ne’ebé ba sa’e sabuk.
Komandante Jerál v PNTL vizita mós Kompañia Delta Unidade Espesiál Polísia (UEP) no Postu Vijilánsia Unidade Polísia Marítima (UPM) iha Loes, Postu Administrativu Maubara, Munisípiu Liquiça.
Jornalista : Eugénio Pereira
Editór : Francisco Simões
