Ministru Ensinu Superiór, Siénsia no Kultura, Longuinhos dos Santos. Imajen/Egas Cristovão

DILI,07 outubru 2020 (TATOLI)-Ministériu Edukasaun Siénsia no Kultura (MESSK) liuhosi Komisaun Asesu Engresu Ensinu Superiór (KAES) daudaun ne’e elabora hela rekezitu ba estudante finalista Ensinu Sekundária Jerál no Tékniku Vokasionál atu asesu vaga iha Universidade Nasionál Timor Lorosa’e (UNTL) iha 2020.

MESSK Longuinhos dos Santos, iha fulan kotuk liubá estabelese ona memorandu intendimentu (MoU-sigla inglés) ho Ministra Solidaridade Sosiál no Inkluzaun (MSSI), atuál Vise Primeiru-Ministru, Armanda Berta dos Santos, kona-ba rejime espesiál ba oan ki’ak 910 hodi asesu UNTL no Institutu Institutu Politékniku Betano (IPB).

Notísia Relevante :Governu oferese vaga 910 ba oan kiak asesu UNTL

Aleinde MSSI, Ministériu Edukasaun Siénsia no Kultura mós estabelese ona MoU ida ho Ministru Asuntu Kombatente Libertasaun Nasionál (MAKLN), Júlio da Costa Sarmento, hodi oferese mós vaga ba veteranu nia-oan ne’ebé maka atu asesu UNTL.

MAKLN propoin vaga 1.300 ne’e sei fahe ba Munisípiu 12 hamutuk ema 1.200 no Rejiaun Administrativa Espesiál Oé-Cusse Ambeno (RAEOA), 100 ho kritéria tenki iha valór di’ak.

“Normalmente estudante ne’ebé mak atu tama ba UNTL tenki prienxe duni rekezitu sira ne’ebé mak KAES sei prepara, agora rejime espesiál ba Veteranus sira mós hanesan inklui mós ba oan ki’ak sira,” nia dehan ba Tatoli, iha Parlamentu Nasionál, kuarta ne’e.

Daudaun ne’e, tuir nia katak KAES halo hela desiminasaun informasaun kona-ba rejime espesiál asesu UNTL no IPB ne’e ba Munisípiu 12 inklui RAEOA.

Depois ramata ona sosializasaun maka Governu sei  anunsia rekezitu ba públiku hodi konkore vaga refere.

“Ne’e duni informasaun balun iha sosiál mídia hateten veteranus sira nia-oan la presiza prienxe kriteria ne’e laloos,” Governante hateten.

Notísia Relevante :Asesu UNTL, MAKLN propoin vaga ba veteranu nia-oan 1.300

Jornalista : Tomé Amado

Editór : Agapito dos Santos

HAKEREK NO HATÁN

Please enter your comment!
Please enter your name here