Ofisiail Funsionariu husi Ministeriu Solidaderidade kontinua halao pagamentu subsidiu $200 ba komunidade sira iha Sede Suku Bairo Pite,. Imajen/Antonio Goncalves

DILI, 07 outubru 2020 (TATOLI)–Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto, hateten fulan ne’e (outubru) MSSI halo ona pagamentu subsídiu $200 ba reklamante sira iha munisípiu 12 inklui Rejiaun Administrativu Espesiál Óe-Cusse Ambeno (RAEOA).

Notísia Relevante: Reklamasaun verifikadu hamutuk 12.590 sei simu subsídiu $200

“Parese iha fulan ne’e, ita bele ona halo pagamentu ba ita-nia reklamante sira iha territóriu Timor-Leste. Verifikasaun ba dadus reklamasaun sira-ne’e  seidauk konklui hotu tanba seidauk finaliza. Tanba ne’e hein katak orsida lorokraik bele finaliza no iha tempu badak bele anúnsia ona ba públiku,” dehan Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto, ba Agência TATOLI iha nia knaar fatin MSSI Caicoli, dili, kuarta ne’e.

Tuir diretór MSSI hateten, reklamasaun purvolta rihun 12-resin mak verifika hotu ona maibé hira mak elizivel atu simu subsídiu $200 ne’e seidauk hatene tanba ekipa verifikasaun  seidauk finaliza dadus reklamasaun.

“Ita seidauk hatene hosi rihun 12-resin reklamasaun ne’e hira mak elizivel atu simu subsídiu $200 ne’e,” nia hatete.

Nia hateten, Ministériu Administrasaun Estatál (MAE) haruka tan dadus reklamasaun hamutuk rihun ida-resin hodi kruza ho total dadus ne’ebé mak iha ona ne’e, depois mós simu lista reklamasaun purvolta atus 400 hosi Parlamentu Nasionál.

Ho dadus sira-ne’e, nia hateten sei kruza ho lista reklamasaun ne’ebé mak MSSI simu antes ona ne’e. no se lista naran benefisiáriu mak hanesan ka dubru sei esklui tiha naran ida entre iha lista sira ne’e.

“Parese autoridade suku sira mak ba hato’o iha Parlamentu Nasionál liga ba benefisiáriu balun iha aldeia hosi Postu Maubara nian ne’ebé mak seidauk simu subsídiu ne’e,” nia hateten. 

Bainhira verifikasaun dadus mak finaliza ona MSSI sei halo proposta ba Ministériu Finansa (MF) para bele transfere osan ba kada suku sira.

Nai dehan, tanba tenke hatene presiza ema na’in hira mak ba halo pagamentu no loron hira mak bele termina no kareta hira mak fasilita ekipa pagamentu nune’e prosesu hotu sei la’o tuir ida-ida hodi labele halo sala bainhira tama ona prosesu pagamentu.

“Ho ida ne’e, ha’u hanoin prosesu pagamentu ba reklamante sira-ne’e ho másimu mak loron lima (5) no mínimu mak loron tolu (3).

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here