Sarani sira hala’o peregrinasaun ba sítiu Na’in-Feto iha Ramelau. Imajen Tatoli/António Gonçalves

AINARO, 07 outubru 2020 (TATOLI)–Diretór Jerál Turizmu Ministériu Turizmu, Komérsiu no Indústria (MTKI), José Filipe Quintas, informa durante situasaun pandemia COVID-19 no Estadu Emerjénsia (EE), vizitante sira iha sítiu Na’in-Feto Ramelau konsege kontribui $20.000.

“Kontribuisaun hosi vizitante sira kuaze $20.000-resin no ida ne’e ita seidauk temi rendimentu. Durante fulan-jullu ministériu rekolla $6.000-resin no fulan-agustu $7.000-resin,” Diretór ne’e informa ba Agência Tatoli, kuarta ne’e, iha sítiu Ramelau, postu administrativu Hatubelico, munisípiu Ainaro.

Nia esplika, kontribuisaun hosi vizitante, jestór sira sei uza hodi hadi’a no halo manutensaun iha fatin sagradu ne’e.

“Agora númeru vizitante kontinua sa’e. Tanba ne’e, observasaun Ministériu Turizmu, Komérsiu no Indústria katak sítiu turístiku ne’ebé turista doméstiku vizita barak liu maka Ramelau tuir dadus ne’ebé hatudu,” nia akresenta.

Ho númeru vizitante ne’ebé sa’e, Diretór ne’e sujere ba Governu atu haree planu tempu naruk no halo investimentu nune’e bele hetan retornu.

“Kada fulan kontribuisaun mós sei sa’e. Ne’e mak ami nia planu iha tinan 2021 tenke halo ona investimentu,” nia fó hanoin.

Tanba ne’e, nia konsidera arkedioseze Dili no parte Governu presiza envolve setór privadu hodi halo jestaun ba sítiu relijiozu ne’e.

Jornalista: Natalino Costa 

Editora: Julia Chatarina

HAKEREK NO HATÁN

Please enter your comment!
Please enter your name here