Diretora Ezekutiva Laboratoriu Nasional Endang Soares da Silva. Imajen /Egas Cristovão

DILI, 07 outubru 2020 (TATOLI)-Laboratóriu Nasionál (LABNAS), daudaun ne’e instala ona mákina Polymerase chain reaction (PCR) iha Munisípiu neen hodi halo teste ba suspeitu COVID-19.

Mákina rapid PCR ne’e instala iha Ospitál Rejionál Oé-Cusse, Ospitál Referál Suai, Ospitál Viqueque, Ospitál Referál Maliana, Ospitál Referál Baucau no Ospitál Referál Maubesi.

“Iha kazu ruma kona-ba COVID-19 sira teste iha ne’ebá la presiza mai iha Laboratóriu Nasionál,” katak Diretora Laboratóriu Nasionál, Endang Soares, ba jornalista sira iha nia kna’ar fatin kuarta ne’e.

LABNAS iha mákina PCR hamutuk ualu, hitu distribui ona ba munisípiu neen, ida fó ba Klibur Domin Bairru-Pité no ida mantein iha Laboratóriu Nasionál.

”Ita iha mákina rapid PCR ualu ita distribui ba Munisípiu neen ita mós distribui ba ospitál klibur domin Bairru-Pité ida no ida iha Laboratóriu Nasionál para ita-nia kapasidade teste rapid PCR la’ós de’it iha nasionál maibé kobre hotu ba Munisípiu sira,” Ezekutiva hateten.

Mákina PCR tolu ne’ebé mak antes ne’e hetan apoia husi Organizasaun Internasionál ba Migrasaun (IOM-sigla inglés) sei distribui ba fronteira Terrestre Batugade Munisípiu Bobonaro.

“IOM apoiu tan mákina tolu GeneXpert ne’ebé ita iha planu sei distribui tan ba Batugade no Bobonaro,’’ nia hateten.

Jornalista : Felicidade Ximenes

Editór : Agapito dos Santos

HAKEREK NO HATÁN

Please enter your comment!
Please enter your name here