Arsebispu ba Arquidiocese Metropolitana Dili, Dom Virgílio do Carmo da Silva, akompaña ho Amu Pároku Ainaro, membru Governu balun no komunidade, vizita kapela santuáriu no realiza misa, iha Hatubelico, tersa (06/10). Imajen Tatoli/António Gonçalves

AINARO, 06 outubru 2020 (TATOLI)—Komunidade postu administrativu Hatobuilico, munisípiu Ainaro, hetan vizita hosi Arsebispu ba Arquidiocese Metropolitana Dili, Don Virgílio do Carmo da Silva.

Prezensa Don Virgílio atu prezide misa iha kapela santuáriu loron 08 outubru nu’udar loron peregrinasaun nasionál ne’ebé sempre selebra iha kada tinan no iha tempu hanesan akompaña komunidade realiza tara-bandu iha sítiu Na’in-Feto Ramelau.

Sarani Hatubelico simu vizita hosi Arsebispu ba Arquidiocese Metropolitana Dili, Dom Virgílio do Carmo da Silva, iha kapela santuáriu, tersa (06/10). Imajen Tatoli/António Gonçalves

Administradór munisípiu Ainaro, Albertinho Soares, agradese ba vizita Arsebispu Dili.

“Ami sente hanesan previléjiu tanba bele vizita ami no prezide misa,” tenik Administradór ne’e iha Hatubelico, tersa ne’e.

Iha sorin seluk, objetivu atu estabelese tara-bandu tanba haree ba pasadu iha joven barak maka bainhira halo vizita Na’in Feto Ramelau, estraga ambiente no konsidera fatin ne’e hanesan baibain, tanba ne’ehosi parte Governu liuhosi Ministériu Turizmu, Komérsiu no Indústria (MTKI) hamutuk ho Igreja hakarak implementa regra.

Lia-na’in sira realiza tara-bandu iha Hatubelico, tersa (06/10). Imajen Tatoli/António Gonçalves

“Tara-bandu ne’e ami hamutuk ho Amu Pároku, joven, no autoridade hanesan sub tara-bandu maibé agora atu halo hosi Amu Bispo ne’e importante tebes no ami kontente ho misa ne’ebé Amu Bispu rasik prezide tanba bele fó tulun ba ami sarani Hatubelico,” dehan Administradór Ainaro.

Antes ne’e, komisaun organizadora hasai ona sasan lulik sira hosi uma lisan Hatubelico no bainhira to’o ona Na’in-Feto Ramelau maka sei tau sasán kulturál sira no realiza tara-bandu atu nune’e fatin ne’e sai sagradu.

Tuir planu iha madrugada tuku 02:00 kuarta (07/10), Arsebispu Dili no sarani sira sei halo prosesaun ba Na’in-Feto Ramelau no realiza misa.

Jornalista: Natalino Costa
Editora: Julia Chatarina

HAKEREK NO HATÁN

Please enter your comment!
Please enter your name here