Primeiru-Ministru, Taur Matan Ruak, felisita loron mundiál ba profesór. Imajen/GPM

DILI, 06 outubru 2010 (TATOLI)Relasiona ho loron mundiál ba profesór sira ne’ebé kada tinan sempre selebra iha 05 outubru, maka Governu felisita loron espesiál ne’e.

Primeiru-Ministru (PM), Taur Matan Ruak, konsidera loron espesiál ne’e ba profesór sira ninia dedikasaun, empeñu no kontribuisaun hodi hanorin no eduka sosiedade.

“Profesór nu’udar eroi verdadeiru no eroi sein rekoñesimentu ne’ebé dedika energia tomak hosi loron ba loron hodi atura no hanorin ita-nia oan sira atu sai ema util ba povu no nasaun,” hateten Xefe Governu liuhosi nota ofisiál ne’ebé Agência Tatoli asesu iha tersa ne’e.

Xefe ezekutivu ne’e dehan, profesór nu’udar pilár importante ne’ebé bele molda karatér estudante sira sai ema edukadu no iha valór ba sosiedade.

“Aproveita loron ne’e, hodi ha’u-nia naran rasik no lori VIII Governu Konstitusionál nia naran, hakarak hato’o parabéns ba profesór hotu iha teritóriu laran tomak ba imi-nia loron espesiál ida ne’e,” subliña PM Taur.

Nia kompromete Governu sei kontinua halo esforsu tau-matan nafatin ba profesór no sistema edukasaun iha rai laran, atu nune’e bele eleva kualidade edukasaun.

Xefe Governu agradese ba dedikasaun profesór sira hotu.

“Agradese ba imi-nia dedikasaun, pasiénsia, persisténsia, responsabilidade no kariñu ne’ebé hatudu liuhosi hanorin no ezemplu prepara rekursu umanu ho kualidade ba dezenvolvimentu no moris di’ak nasaun,” nia tenik.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here