Transporte para iha Estasionamentu iha área Banco Nasionál Ultramarinho (BNU) nia oin. Imajen/Eugénio Pereira

DILI, 06 outubru 2020 (TATOLI)–Diretora Diresaun Jestaun Merkadu no Turizmu-Munisípiu Dili (DGMT-MD), Justina Amaral, hatete iha tinan ne’e Governu liuhosi DGMT-MD ofisiál kontrollu ba estasionamentu haat iha Munisípiu Dili hatama reseita hamutuk $5,736,34 ba kofre estadu.

Notisia Relevante: Governu deside atu alarga tan estasionamentu iha Hudi-Laran

“Iha Tinan ne’e, ita hatama reseita estasionamentu nian hamutuk $5,736,34 ba kofre estadu,” dehan Diretora DGMT-MD, Justina Amaral, ba jornalista sira iha nia knaar fatin, Matadouro, Dili, tersa ne’e.

Tinan ne’e, nia informa taxa hosi estasionamentu menus liu tanba iha 2019 DGMT-MD hatama ona reseita ba Estadu hamutuk $27,015,05.

Durante COVId-19, nia dehan, Estadu Timor-Leste dekreta Estadu Emerjénsia (EE) hahú fulan marsu depois estende to’o maiu nia laran, entaun durante fulan tolu ne’e pesoál kontrollu estasionamentu la ativu tanba ema labele halo movimentu entaun Governu labele hetan reseita.

Diretora ne’e hateten, pesoál estasionamentu iha Kapitál Dili limitadu hodi labele kontrollu ema barak ne’ebé mak para karreta no motor iha estasionamentu ne’e.

“Iha estasionamentu balu ita labele koloka pesoál ba fatin estasionamentu tanba ita-nia pesoál sira limitadu, entaun iha estasionamentu balu ne’e ita tau de’it ema nain-ida (1) ka rua (2) entaun labele kontrollu hotu tanba ema barak,” diretora DGMT-MD ne’e hateten.

Iha estasionamentu haat ne’e, nia dehan, ofisiál hamutuk 49 mak kobre iha pintura no sinais ne’e no ofisiál sira-ne’e mesak fusionáriu kontratadu hosi Munisípiu Dili.

“Maibé futuru ita sei haree asuntu hanesan ofisiál estasionamentu tanba estasionamentu fó reseita di’ak ba estadu ida-ne’e,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here