Polísia Eskuadra Vera Krús detein estudante, São José Operario, Balide, Dili, ne’ebé halo agresaun fíziku ba estudante balun iha Eskola Kristál, Dili. Imajen Tatoli/Eugénio Pereira

DILI, 06 outubru 2020 (TATOLI)- Komandu Polísia Eskuadra Vera Krús, Dili, ohin, ezekuta mandadu detensaun ba estudante na’in-haat hosi Eskola São Jose Operario, Balide, Dili, ne’ebé identifika nu’udar autór  halo torturasaun ba vítima Estudante Eskola Désimu Primeiru Anu Kristál, Cejarmino Moy da Silva, tinan 16, ne’ebé viral ona iha rede sosiál Facebook.

Suspeitu estudante na’in-haat ne’ebé, ohin, PNTL ba foti hosi sira nia Eskola São Jose Operario Balide, Dili, ho inisiál JCS, IG, DS no IP.

Kazu agresaun fíziku tuku no tebe ne’e rezulta  vítima, Cerjarmino nia matan kuana hetan pankada maka’as too metan.

Segundu Komandante PNTL, Superintendente, Euclides Belo dehan, asaun agresaun fíziku ne’e nu’udar krime públiku, PNTL sei prosesa kazu ne’e ba Ministériu Públiku.

“Suspeitu ita foti mai halo ona investigasaun, tanba agresaun fíziku ne’ebé halo hosi suspeitu no vítima. PNTL haree ida ne’e krime públiku, PNTL sei prosesa ba Ministériu Públiku, tanba suspeitu sira lansa mós asaun sai viral iha Facebook,” hateten Euclides Belo ba jornalista iha Eskuadra PNTL, Caicoli, Dili.

Nia dehan, ba oin, PNTL Dili sei koordena ho profesór sira hosi Eskola Kristál no Eskola São José  Operario, inklui inan no aman sira, hodi sensibiliza informasaun ba profesór inklui estudante oinsá promove paz iha eskola hotu- hotu.

Iha fatin hanesan, inan hosi vítima Estudante Eskola Désimu Primeiru Anu Kristál, Serafina Veronica Moy, deklara lamenta tebes bainhira haree iha Facebook ninia oan hetan torturasaun maka’as to’o vítima  nia matan metan no sente trauma atu ba eskola.

Nia dehan, atitude hosi estudante sira halo agresaun fíziku ne’ebé tortura ninia oan hanesan asaun krime kontra lei.

“Hanesan inan, ha’u sente laran moras, tanba sira baku tiha ha’u nia ona, sira halo tan vídeo públika fali iha Facebook, entaun hanesan inan ita haree sente laran moras tebes,” dehan Serafina Veronica ba Agência Tatoli iha Eskuadra Polísia, Vera Krús, Dili.

Serafina hatutan, ho problema ne’ebé akontese, nu’udar inan rasik koordena ho parte família ne’ebé baku  nia oan hodi rezolve ona, maibé parte PNTL konsidera kazu ne’e krime públiku.

Nia hatutan, sira-nia parte prontu tuur ho família hosi suspeitu sira hodi rezolve tuir dalan familiar hodi hakotu kazu ne’e atu labele akontese tan iha futuru.

Jornalista       : Eugénio Pereira

Editór             : Francisco Simões

1 KOMENTÁRIU

  1. Tia rejolve tuir dalan famili ne’e la fo vantazem diak ba ita nia pratikante krime brutalismu no bandelism nain sira, ida ne hanesan halo sira abitua no la tauk. Husik ba tuir dalan prosessu juridiku nian hodik bele hatene estadu moris ho lei no ordem.
    Abraço

HAKEREK NO HATÁN

Please enter your comment!
Please enter your name here