Governu ho Parlamentu Nasional Votasaun Proposta OJE 2020 iha debate faze Espesialidade, iha sala plenáriu PN, segunda (05/10). Imajen Tatoli/Egas Cristovão

DILI, 06 outubru 2020 (TATOLI)—Parlamentu Nasionál, tersa ne’e, aprova ona proposta orsamentu hosi Ministériu Administrasaun Estatal (MAE) ho rezultadu a-favór 43, kontra 7 no abstensaun 11.

“Orsamentu ba Ministériu Administrasaun Estatal aprovadu,”  Prezidente Parlamentu Nasionál, Deputadu Aniceto Longuinghos Guterres Lopes, anunsia liuhosi plenária, tersa ne’e.

Ministériu Administrasaun Estatal (MAE) lideradu Miguel Pereira de Carvalho sei promove desentralizasaun administrativa no konserva dokumentu istóriku iha tinan 2020.

Medida prinsipál setoriál iha tinan 2020 ne’e promove desentralizaun administrativa, dezenvolve kapasidade institusionál no rekursu umanu, kria kondisaun ba instalasaun efetiva autarkia lokál no prezerva no konserva istória no kultura Timor-Leste liuhosi konservasaun dokumentu istóriku sira.

Iha Planu Asaun Anuál ne’e Ministériu Administrasaun Estatal kontinua asegura administrasaun eleitorál, kontribui halo redusaun ba dezigualdade jéneru, mellora kondisaun sosioekonómika, governasaun lokál, dezenvolve juventude iha nível munisipál, postu administrativu no suku sira.

Nune’e mós promove dezenvolvimentu hahú hosi suku no retornu ekonómiku ne’ebé aas hosi baze, kria sistema toponímia hanesan naran ba dalan sira (nome para as ruas), númeru edifísiu públiku jardin sira, parke no largo iha territóriu Timor-Leste no promove boa governasaun iha MAE no servisu hotu ne’ebé tutela iha ministériu refere.

Ho medida prinsipál hirak ne’e Ministériu Administrasaun Estatal (MAE) propoin orsamentu 2020 nian ho montante $14,729,411 ne’ebé fahe ba kategoria sira hanesan saláriu no vensimentu $3,630,000, bens no servisu $2,633,076, kapitál minór $25,000, laiha kapitál dezenvolvimentu no transferénsia públika $8,441,335.

Ho totál orsamentu hirak ne’e, MAE sei implementa orsamentu kada programa ho kódigu 510 ba boa governasaun no  jestaun institusionál. Programa ne’e ho totál orsamentu $5,691,850. Orsamentu millaun $5-resin ne’e komposta hosi saláriu no vensimentu $3,630,000, bens no servisu $2,036,850 no kapitál minór $25,000.

MAE mós implementa programa ho kódigu 511 kona-ba organizasaun urbana ho totál orsamentu $1,465,623 ne’ebé koloka iha bens servisu $16,510.

Purtantu programa ho kódigu 512 kona-ba desentralizasaun administrativa ho totál orsamentu $1,465,623 ne’ebé koloka ba bens servisu $215,623 no transferénsia públika $1,250,000 .

Entretantu programa ho kódigu 513 kona-ba prezervasaun no konservasaun ba dokumentu valór istóriku sira ho totál orsamentu $43,094 iha bens servisu.

MAE mós sei implementa programa ho kódigu 517 kona-ba administrasaun eleitorál ho totál orsamentu $118,637 iha bens no servisu.

Programa ho kódigu 518 kona-ba dezenvolvimentu suku sira no retornu ekonómiku bázika ho orsamentu $7,393,697 komposta hosi saláriu no vensimentu $202,362 no transferénsia públika $7,191,335.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here