Primeiru-Ministru, Taur Matan Ruak, hamutuk ho membru Governu sira defende Proposta OJE 2020 iha debate faze Espesialidade, iha sala plenáriu. Imajen Tatoli/Egas Cristovão

DILI, 06 outubru 2020 (TATOLI)-Iha diskusaun faze jeneralidade ba proposta Orsamentu Jerál Estadu (OJE) 2020, deputadu sira hamosu proposta aloka orsamentu $623.000 atu funsiona servisu Aeroportu no Navegasaun Aérea Timor-Leste, empreza públika (ANATL,E.P).

Proposta ne’e pasa ho rezultadu a-favór 43, kontra 4 no abstensaun 16.

Razaun proponente sira hamosu proposta tanba pandemia COVID-19, fó impaktu ba atividade voo komersiál internasionál, tanba ne’e empreza públika ne’e labele rekolla reseita hanesan bainbain.

Governu liuhosi Ministériu Transporte no Komunikasaun (MTK) agradese deputadu sira tanba bele hamosu proposta ida funsiona atividade empreza estatál ne’eiha aeroportu.

“Ami agradese tanba situasaun agora ANATL presiza tebes orsamentu ne’e. Objetivu hosi alokasaun atu garante funsionamentu no atendimentu iha aeroportu internasionál,” hateten Ministru Transporte no Komunikasaun, José Agostinho da Silva, iha sala plenáriu Parlamentu Nasionál (PN), tersa ne’e.

Governante ne’e informa, durante ne’e ajénsia autónomu ne’e hatama reseita ba kofre Estadu, maibé tinan ne’e hetan difikuldade no la konsege atinje projesaun reseita.

“Bainhira situasaun normál sira bele rekolla reseita $2.885.839, maibé ho situasaun atuál sira la konsege atinje projesaun no konsege rekolla de’it reseita pur volta $845.225,29,” nia akresenta.

Tuir Ministru, reseita ne’ebé iha la sufisiente atu empreza públika ne’e sustenta funsionamentu normál iha Aeroportu Internasionál Prezidente Nicolau Lobato, Comoro, tanba ne’e maka mosu proposta atu prevee osan adisionál.

Iha fatin hanesan, Deputada Bankada FRETILIN, Maria Angelica Rangel, konsidera servisu ANATL importante tebes.

“Hafoin tama situasaun surtu COVID-19, atividade iha aeroportu kuaze la hatama reseita no ANATL presiza osan atu halo servisu no mós direitu balun maibé realidade la aloka orsamentu iha períodu doudésimu,” Deputada Bankada Governu ne’e fundamenta.

Tanba ne’e, Deputada ne’e konsidera hafoin loke aeroportu maski voo komersiál internasionál seidauk ativa maibé traballadór sira iha aeroportu sei nafatin fó apoiu ba aviaun sira ne’ebé tun iha aeroportu Comoro iha situasaun emerjénsia no tula ai-moruk, ekipamentu saúde inklui ema.

“Sira presiza osan nune’e halo sira-nia servisu administrativamente,” nia akresenta.

Reprezentante povu ne’e dehan, Governu presiza aloka osan no sei foti hosi fundu rezerva kontijénsia.

Deputadu Bankada FRETILIN, Favião Oliveira, konsidera proposta ne’e importante tanba tuir dekretu-lei númeru 3/2006, ANATL iha knaar ida atu halo esplorasaun no dezenvolvimentu infraestrutura aeroportuáriu no navegasaun áerea.

“Ha’u hanoin iha 2020 sira iha projesaun hetan reseita, maibé tanba ho situasaun COVID-19 entaun sira la konsege tanba kada tinan despeza ba sira-nia saláriu hosi reseita atuál, maibé tinan ne’e la konsege tanba fulan-tolu halo despeza ba sira-nia empreza ne’e rasik,” Deputadu Bankada Governu ne’e realsa.

Deputadu ne’e konsidera, orsamentu ne’e bele ajuda instituisaun ne’e normaliza administrasaun no bele hatama reseita ne’ebé identifika iha fonte reseita 21.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here