Primeiru-Ministru, Taur Matan Ruak, hamutuk ho membru Governu sira defende Proposta OJE 2020 iha debate faze Espesialidade, iha sala plenáriu. Imajen Tatoli/Egas Cristovão

DILI, 06 outubru 2020 (TATOLI)—Ministériu Justisa (MJ) lideradu Manuel Cárceres prioritiza medida prinsipál 10 durante tinan fiskál 2020.

Rezultadu votasaun ba orsamentu hosi Ministériu Justisa (MJ) nian a-favór 44, kontra 11, no abstensaun 10.

Ministru Justisa Manuel Cárceres, esplika montante orsamentu ne’e balun ezekuta ona hahú hosi janeiru to’o setembru 2020.

“Orsamentu ba Ministériu Justisa nian pasa,” Prezidente Parlamentu Nasionál, Deputadu Aniceto Longuinghos Guterres Lopes, anunsia liuhosi plenária, tersa ne’e.

Ministériu Justisa prevee orsamentu $11,609,323 ne’ebé fahe ba saláriu no vensimentu $4,613,912, bens (sasán) no servisu $6,458,580, kapitál minór $342,830 no kapitál dezenvolvimentu 194,000. Laiha transferénsia públika. Montante orsamentu hirak ne’e ezekuta ona hahú hosi janeiru to’o setembru no resta orsamentu sei ezekuta hahú hosi outubru, novembru no dezembru.

Medida prinsipál setór dahuluk hosi Ministériu Justisa ba tinan fiskál 2020 promove asesu ba justisa, medida prinsipál daruak kontinua asegura funsionamentu normál, mellora servisu prizionál no reinsersaun sosiál.

Medida prinsipál datoluk promove direitu umanu no medida prinsipál dahaat fó kontinuidade ba dezenvolvimentu kadastru nasionál rai (terras) no propriedade, sei halo levantamentou no  aumenta númeru parsela kadastrál iha territóriu nasionál.

Medida prinsipál dalima garante funsionamentu normál, mellora servisu rejistu sira, notariadu no identifikasaun sivíl no medida prinsipál daneen kontinua fó formasaun majistradu sira, defensór públiku sira, advogadu privadu sira, Sentru Formasaun Jurídika no Judisiária ne’ebé empodera servisu judisiál.

Medida prinsipál dahitu mellora asesu justisa ba populasaun liuhosi julgamentu movel sira, divulgasaun no regulamentasaun lei sira.

Mdida prinsipál setoriál daualu implementa polítika jéneru no medida prinsipál dasia sei konsentra atribuisaun hotu-hotu Governu nian relasaun ho matéria reforma judisiária.

Medida prinsipál ikus liu mak promove boa governasaun, jestaun institusionál iha ministériu nian no servisu hotu ne’ebé depende ba ministériu refere.

Hosi medida prinsipál hirak ne’e Ministériu Justisa prevee orsamentu $11,609,323 ne’ebé fahe ba saláriu no vensimentu $4,613,912, bens (sasán) no servisu $6,458,580, kapitál minór $342,830 no kapitál dezenvolvimentu 194,000.

Hosi orsamentu $11,609,323 Ministériu Justisa nian koloka ba programa ho kódigu 389 hodi dezenvolve rekursu umanu iha área téknika espesífika iha setór justisa gasta $26,576 ne’ebé prevee iha bens (sasán) no servisu.

Nune’e mós programa ho kódigu 391 halo reforma lejizlativa no kuadru legál. Programa ne’e sei gasta $22,576 ne’ebé prevee iha bens (sasán) no servisu.

Purtantu programa ho kódigu 392 kona-ba asesu ba justisa sei gasta $1,333,185 no programa kódigu 394 kona-ba servisu prizionál no reinsersaun sosiál  gasta $1,186,139 ne’ebé prevee iha bens servisu.

Programa ho kógidu 395 kona-ba direitu umanu gasta $1,000  no programa ho kódigu 396 kona-ba jestaun rai no propriedade gasta $3,095,305.

Entretantu programa ho kódigu 397 kona-ba rejistu, notariadu no identifikasaun sivíl ne’ebé prevee iha bens servisu no kapitál dezenvolvimentu hamutuk $171,250.

Programa ho kódigu 510 kona-ba boa governasaun no jestaun institusionál ho orsamentu $974,570 ne’ebé prevee iha bens servisu no kapitál minór.

Programa  ikus liu ho kódigu 800 kona-ba edifísiu públiku gasta $184,809 ne’ebé prevee iha kapitál dezenvolvimentu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here