Ministériu Justisa, Provedoria Direitu Umanu no Justisa (PDHJ) ho Asosiasaun Prevensaun no Kontra Tortura hosi Suisa (iha Jenebra) asina akordu entendimentu. Dili, 06 outubru 2020. Imajen Tatoli/Nelson de Sousa

DILI, 06 outubru 2020 (TATOLI)-Governu Timor-Leste liuhosi Ministériu Justisa (MJ), Provedoria Direitu Umanu no Justisa (PDHJ) ho Asosiasaun Prevensaun no Kontra Tortura hosi Suisa (iha Jenebra), ohin, ofisiálmente asina akordu entendimentu (MoU/Memorandum of Understending)  tripartida ba kooperasaun iha area prevensaun tortura ba sidadaun, oinsá defende onra halo tratamentu ba ema hotu hanesan.

Serimónia ne’e hala’o liuhosi virtual parte Timor-Leste ho Suisa nian, ne’ebé asina direita hosi Ministru Justisa, Manuel Cárceres da Costa, Provedora Direitu Umanu no Justisa, Jesuína Maria Ferreira iha edifísiu Ministériu Justisa, Caicoli, Dili.

Manuel Cárceres da Costa hateten, kooperasaun ne’e atu haree polítika ida hodi implementa hodi halakon tortura oinsá fó protesaun ba ema hotu iha sosiedade laran.

“Asinatura MoU tripartida Ministériu Justisa reprezenta Governu Timor-Leste no PDHJ ho Asosiasaun ba Prevensaun Kontra Tortura iha Jenebra ho nia Sekretáriu Jerál nia intensaun atu haree polítika ida implementa halo konsensializasaun ba sidadaun hotu atu halo prevensaun ba tortura sira hodi defende onra sidadaun sira nian,” hateten Ministru Justisa, Manuel Cárceres.

Nia hateten, presiza polítika ida forti halo konsensializasaun ba sidadaun hotu, liu-liu ba maluk guarda Prizionál sira ne’ebé loro-loron moris hamutuk ho prizioneiru sira iha prizaun, tanba maluk sira iha prizaun veneravel tebes sira bele hasoru tortura oin-oin.
Provedora PDHJ, Jesuína Maria Ferreira hateten, akordu ne’e atu fortalese esforsu nasionál ba iha prevensaun tortura no mós maus tratu, iha sosiedade ba sidadaun hotu iha tratamentu hanesan labele iha tratamentu kruél, dezumanu no degradante.

Akordu ne’e mós foka ba kapasitasaun atu hasa’e koñesimentu ba pesoál sira iha Ministériu Justisa liu-liu Guarda Prizionais no entidade relevante hanesan PNTL,F-FDTL nune’e sira bele hatene importánsia atu integra estratéjia prevensaun intervensaun durante hala’o kna’ar.

Jesuína Maria Ferreira informa, iha etapa prinsipál ba atividade tolu sei hala’o hanesan; dahuluk sei halo konsultasaun dijitál tanba daudaun situasaun pandemia COVID-19 la’o hela, nune’e parte sira komunika malu, daruak; halo online peskiza (survey) medida nasionál atu halo prevensaun ba tortura no maus tratu.
Ikus liu mak sei dezenvolve módulu treinamentu ida kona-ba prevensaun tortura no maus tratu.

Kooperasaun ne’e ho nia implementasaun durante tinan tolu; 2020-2023, Ministériu Justisa no PDHJ mak sei implementa.

Governu Suisa (Suisa Federation Government) liuhosi Asosiasaun ba Prevensaun no Kontra Tortura sei fó asisténsia téknika ho legal no kada tinan sei apoiu fundu mill €30.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here