Ekipa konjunta kompostu hosi PDHJ, CAC, CFO ho IJE halo vizita surpreza ba HNGV, Dili, 06 outubru 2020. Imajen Tatoli/Nelson de Sousa

DILI, 06 outubru 2020 (TATOLI) – Ekipa konjunta kompostu hosi Provedoria Direitu Umanu no Justisa (PDHJ), Komisaun Funsaun Públika (CFP), Komisaun Anti-Korrupsaun (CAC) ho Inspesaun Jerál Estadu (IJE), ohin, hala’o vizita surpreza ba iha Ospitál Nasionál Guido Valadares (HNGV) hodi konfirma kona-ba keixa hosi médiku jerál (Pos Graduação ) na’in-sia (9) nian hasoru dirijente másimu HNGV iha prosesu destakamentu ne’ebé deskonfia mosu abuzu podér.

Ekipa ne’e lidera direita hosi Provedór Adjuntu Boa Governasaun Direitu Umanu no Justisa, José Telo Soares Cristovão, akompaña hosi Komisáriu Komisaun Funsaun Públika ba asuntu Portafóliu Planeamentu Forsa Traballu, Avaliasaun Dezempeñu, Formasaun no Dezenvolvimentu, António Freitas, ho Komisáriu Adjuntu ba Asuntu Prevensaun no Sensibilizasaun CAC, Luis de Oliveira Sampaio.

José Telo Soares Cristovão, konfirma katak, ekipa konjunta nia prezensa iha HNGV ho objetivu hosi vizita ne’e bazeia ba keixa hosi médiku na’in-sia ne’ebé servisu iha HNGV iha Diresaun Pediatria hanesan funsionáriu permanente katak, iha keixa kona-ba irregularidade (abuzu podér) la tuir prosesu administrativu balun ho desizaun Diretór Ezekutivu HNGV nian iha fulan rua liubá, deside halo destakamentu ba sira ba fali iha Ministériu Saúde (MS), maibé laiha justifikasaun klaru.

“Ami nia papél vizita ne’e atu mai buka tuir hodi hatene motivu saida mak transfere sira no buka fó solusaun tuir keixa ne’e tebes ka la’e,’’ hateten José Telo Soares Cristovão.

Nia dehan, médiku Pos Gradução hirak ne’e hetan suporta hosi Ministériu Saúde (MS) liuhosi HNGV orienta ona sira ba eskola hasai kursu espesialista iha area pediatria.

Fatin hanesan Komisáriu CFP, António Freitas, hateten, prosesu refere antes ne’e komisaun halo levantamentu, ekipa husu ba Diretór Rekursu Umanu HNGV la hatene kona-ba kazu mudansa médiku na’in-sia.

Nia dehan, tuir prosesu legal administrativu HNGV iha autónomu katak nia rasik mak foti nia desizaun, maibé hosi desizaun sira-ne’e parte HNGV fó kompeténsia tomak fila-fali ba Ministériu Saúde (MS) hodi halo desizaun ba kestaun destakamentu.

“Maibé atu halo tenke informa uluk hafoin bele realiza no laiha justifikasaun nune’e sai kestaun ba komisaun no instituisaun boa governasaun sira seluk,’’ nia argumenta.

Iha vizita surpreza ne’e ekipa konjunta mós rona HNGV kontrata tan fali ema voluntária COVID-19 balun koloka fila-fali iha diresaun Pediatria.

Ekipa konjunta kontinua halo levantamentu hodi verifika informasaun hotu ho loloos kuandu iha duni infrasaun mak sei halo auto-notísia hodi prosesa tuir dalan legal.

Diretór klínika HNGV, Falvio Brandão, konsidera inspeksaun surpreza iha ezersísiu di’ak ba haforsa instituisaun HNGV hanesan instituisaun autónoma hodi hala’o servisu funsiona ho profisionál liután liu-liu iha papél administrasaun ho jestaun.

Nia klarifika, médiku pos gradução na’in-sia ne’e tuir formasaun profisionál basiku iha HNGV ho Universidade Nasionál Timor Lorosa’e (UNTL) kuandu hotu ona HNGV destaka ba iha Ministériu Saúde atu halo re-kolokasaun.

“Ida ne’e prosesu normal ba formasaun hotu-hotu médiku barak tuir iha rai-laran no rai-li’ur hanesan, ida ne’e la’ós transferénsia maibé destakamentu,” nia esplika.

Nia konsidera, ho kestaun ne’e laiha problema tanba saida mak HNGV halo tuir prosesu ida, bainhira médiku pos graduacão sira remata tenke halo destakamentu hodi nune’e halo fali re-kolokasaun ne’e kompeténsia Ministériu Saúde nian atu koloka fila-fali ba ospitál ka sentru saúde.

Hatán kona-ba HNGV kontrata voluntária ba COVID-19 hodi hala’o destaka fila-fali iha diresaun pediatria, Diretór Falvio Brandão lia tun dehan, iha pakote ketak ne’ebé sira bele hala’o servisu.

Jornalista       : Nelson de Sousa

Editór             : Francisco Simões

 

HAKEREK NO HATÁN

Please enter your comment!
Please enter your name here