Prezidente Repúblika, Francisco Guterres 'Lú Olo'. Imajen Tatoli/Egas Cristovão

DILI, 05 outubru 2020-Prezidente Repúblika, Francisco Guterres ‘Lú Olo’, dekreta ona Estadu Emerjénsia (EE) daneen ba loron 30 ne’ebé abranje territóriu nasionál tomak, hahú hosi tuku 00:00 loron 05 outubru (segunda) no ramata iha tuku 23:59 loron 03 novembru 2020 (tersa).

Xefe Estadu husu ba entidade hotu, liuliu ba komunidade sira ne’ebé besik fronteira terrestre, atu ajuda nafatin Polísia Nasionál Timor-Leste (PNTL) kontrola pontu entrada sira.

“Ha’u husu ba komunidade ne’ebé hela besik iha fronteira no tasi-ibun atu ajuda nafatin ita-nia PNTL taka dalan ba ilegál sira,” PR apela ba sidadaun sira liuhosi mensajen iha Palásiu Prezidensiál, Bairro Pité, segunda ne’e.

Prezidente Repúblika nota katak durante ne’e ema balun hasees-an hosi kontrola bainhira tama no sai territóriu nasionál liuhosi dalan ilegál, balun autoridade kompetente sira kaer maibé balun lae, tanba ne’e konsidera bele fó risku boot liu komunidade ba moras COVID-19.

“Órgaun soberania sira mesak labele hetan susesu, komunidade sira maka bele garante ba ita-nia luta hasoru COVID-19, tanba ne’e ita ida-idak presiza kuida-an no proteje ema seluk ho media prevensaun hanesan uza máskara, fase liman bebeik no hadook-an metru ida ho balun iha fatin públiku,” nia fó hanoin.

Notísia Relevante: EE daneen: sidadaun tama ilegál hosi fronteira terrestre aplika koima

Fulan agustu to’o setembru ema tama ilegál hamutuk na’in-390 liuhosi fronteira terrestre ho dalan ilegál no hosi númeru ne’e  na’in-222 maka hanesan membru artemarsiál Persaudaraan Setia Hati Terate (PSHT) ne’ebé daudaun autoridade sira halo hela investigasaun.

Xefe Estadu fó atensaun ba fatin kuarentena tanba iha sidadaun balun la kumpre kuarentena mínima loron 14 ne’ebé Governu estabelese ona.

“Ha’u simu informasaun katak ema balun la kumpre kuarentena, ida-ne’e sai preokupasaun boot la’ós de’it ba órgaun soberania sira maibé ba ita hotu tanba bainhira la kumpre kuarentena bele lori moras tama Timor-Leste, tanba karik hada’et ona iha komunidade susar tebes ba Ministériu Saúde atu kontrola no ita tama ba situasaun ema bele moras no mate,” nia subliña.

Tanba ne’e, PR husu atu sidadaun sira tenke kumpre kuarentena ho kontrolu másimu hosi Ministériu Saúde atu evita transmisaun iha komunidade, tanba iha país barak maka lakon kontrolu to’o halo ema lakon vida tanba vírus ne’e.

Maski Xefe Estadu rekoñese katak Timor-Leste labele taka odomatan ba ema atu tama terretóriu nasionál maibé presiza tuir medida ne’ebé Governu hatuur ona.

“Bainhira mai hosi rai-li’ur, hosi rai ne’ebé de’it, biar mai ho sertifikadu laiha moras COVID-19 maibé nafatin tenke tama kuarentena. Deklarasaun Estadu Emerjénsia de’it maka fó dalan ba Governu bele hatama ema iha kuarentena no laiha dalan legál seluk atu obriga ema tama iha kuarentena,” nia realsa.

PR husu responsabilidade entidade idaidak atu garante susesu ba luta foun kontra pandemia globál.

“Timor-Leste tenke sai ezemplu di’ak nafatin ba umanidade tomak, Husu ba sidadaun hotu atu hatuir medida hosi Governu,” Xefe Governu apela.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here