Juiz Administradór TDD, Afonso Carmona. Imajen/Dok.Tatoli

DILI, 05 outubru 2020 (TATOLI)-Tribunál Distritál Dili (TDD), to’o iha fulan setembru, tinan ne’e, finaliza (julgadu) ba prosesu kazu hamutuk 139.

Notísia Relevante : Kazu VD kontinua rejista aas iha TDD

“Hosi kazu ne’e iha prosesu krime 119 no sivíl 20 ne’ebé julgadu iha ona desizaun finál,” informa Juis Administradór Tribunál Distritál Dili, Afonso Carmona, ohin, iha nia kna’ar fatin Mandarin, Dili.

Nia informa tan, to’o iha fulan setembru, tinan ne’e, prosesu kazu tama foun (entrada) 77, julgadu 119, pendente (aguarda/julgamento) la’o hela 2102, no prosesu sivíl iha ba prosesu entrada 27, julgadu 20 no pendente 1,111.

Afonso Carmona esplika, hosi kazu krime ho númeru aas maka violénsia doméstika ho forma violasaun seksuál maustratu ba menór no ofensa korporais no mós arma branka, kondusaun sem karta, korrupsaun no seluk tan.

Ba kazu sivíl mak regulasaun paternal, kazu rai ho sira seluk tan.
“Daudaun ne’e ha’u iha dadus jerál de’it ne’ebé ba kazu sira-ne’e ho tipu saida númeru fisku no julgadu ona hira mak kondena no absolve seidauk iha dadus espesífiku,” hateten Afonso Carmona.

Nia dehan, durante iha implementasaun Estadu emerjénsia iha faze primeiru no segundu fó mós impaktu ba prosesu julgamentu, la konsege realiza ho di’ak.
“Maibé dilijénsia ita nia ofisial justisa halo ona notifikasaun ba parte sira, nune’e, iha ajenda julgamentu sira tuir mai bele marka prezensa iha julgamentu,” nia dehan.

TDD daudaun ne’e iha kolokasaun juis na’in- haat (4) foku ba kazu prosesu sivíl no na’in-10 atende kazu prosesu krime hodi serve ho independénsia, efikás no efisiénsia no fó justisa ba ema hotu hanesan.

TDD mós funsiona julgamentu movel kobre iha area jurisdisaun Dili rasik, no Munisípiu Ermera, Liquiça ho Aileu, ho objektivu atu hakbesik justisa ba povu, liu-liu ba veneravel sira ho natureza kazu violénsia doméstika no seluk ne’ebé envolve populasaun veneravel laiha transporte atu to’o mai iha Dili.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here