Parlamentu Nasionál. Imajen Tatoli/António Gonçalves.

DILI, 05 outubru 2020 (TATOLI)—Proposta alterasaun ba Orsamentu Jerál Estadu (OJE) 2020 hamutuk limanulu resin-ida (51) no hosi proposta hirak ne’e, Parlamentu Nasionál aprova ona hitu (7) sei hela 44. Hosi proposta alterasaun 51 maioria propoin hosi Bankada Opozisaun.

“Proposta alterasaun hamutuk 51, agora ita foin konklui hitu (7),” dehan Prezidente Parlamentu Nasionál, Deputadu Aniceto Guterres, iha debate espesialidade loron dahuluk iha Plenária Parlamentu Nasionál, segunda ne’e.

Proposta dahuluk kona-ba eliminasaun tabela referénsia kada anexu sira, proposta daruak mak alterasaun despeza RAEOA nian, proposta datoluk mak muda hosi viajen estranjeiru ba kapitál minór hodi sosa karreta ida ba Prezidénsia Repúblika no sosa mákina bee-moos.

Proponente Deputadu Joaquim dos Santos, justifika razaun tanba falta de’it fulan rua (2) no problema kauza mundiál defísil halo viajen ba rai-li’ur no foti tan hosi servisu operasionál no Asistente Téknika ho nune’e montante bele kobre sosa fali karreta ba iha Casa Civil, Servisu Operasionál no mós ba seguransa Prezidente Repúblika nian.

Proponente ba proposta dahaat mak hanesan Deputada Virgínia Ana Belo, Maria Terezinha Viegas no Bendita Moniz Magno. Iha propospa ne’e propoin atu diminui montante rihun $313 hosi kategoria bens (sasán) no servisu  alokadu ba viajen estranjeiru (Livru 4-A), ho razaun tempu ba ezekusaun atividade sira-ne’e limitadu no surtu pandemia COVID-19 la permite atu halo viajen ba estranjeiru, maibé proposta ne’e la pasa.

Prosesu tuir Reprezentante Povu sira sei halo diskusaun ba kada proposta no aprova kedas orsamentu kada ministériu nian.

Entretantu proposta alterasaun 51 aprezenta hosi Deputadu Joaquim dos Santos no António Verdiál de Sousa. Iha proposta ne’e propoin halo eliminasaun ba artigu 25 hosi PPL (Proposta Lei) Nú 22/V(3a)

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here