Primeiru-Ministru, Taur Matan Ruak, hamutuk ho membru Governu sira defende Proposta OJE 2020 iha debate faze Espesialidade, iha sala plenáriu. Imajen Tatoli/Egas Cristovão

DILI, 05 outubru 2020 (TATOLI)Agência Noticiosa de Timor-Leste, Institutu Públiku-TATOLI, I.P desde harii iha 07 marsu 2017 hanesan embriaun to’o transforma sai institutu públiku, iha verba orsamentu ne’ebé agrupa ho Sekretaria Estadu Komunikasaun Sosiál (SEKOMS) no ikus liu iha Ministériu Asuntu Parlamentár no Komunikasaun Sosiál (MAPKOMS), maibé daudaun haketak ona.

Vise-Ministra Finansa, Sara Lobo Brites, deklara orsamentu ba mídia estatál ne’e iha proposta Orsamentu Jerál Estadu (OJE) 2020 la tama ona iha verba MAPKOMS.

“Kona-ba diferensa entre livru 4A iha proposta lei orsamentu ba MAPKOMS, tanba ita-nia Agência TATOLI ninia estatutu hanesan institutu públiku sai ona hosi estrutura MAPKOMS no agrupa ketak, tanba ne’e iha proposta lei iha diferensa $362.000 ba TATOLI ninia orsamentu,” dehan Vise-Ministra Sara iha diskusaun proposta OJE 2020 iha faze espesialidade loron dahuluk, iha sala plenáriu Parlamentu Nasionál (PN), segunda ne’e.

Governante ne’e ko’alia lia hirak ne’e hodi hatan ba Deputada Bankada CNRT, Fernanda Lay, ne’ebé preokupa ho alokasaun orsamentu ba MAPKOMS.

“Destingi Ministériu Reforma Lejizlativa no Asuntu Parlamentár (MRLAP) lakon iha maiu hafoin estrutura foun Governu, gastu iha livru 4A tau maibé sein orsamentu, nia orsamentu ba ne’ebé? MRLAP tanba iha gastu no ba MAPKOMS númeru ne’ebé maka loos iha bens servisu millaun $2,55 maibé iha tabela millaun $1,693, ida ne’ebé maka loos tanba ministru sira mai la dehan buat ida,” Deputada bankada opozisaun ne’e kestiona.

Entretantu, iha livru orsamentál 2020, orsamentu Agência TATOLI tama ona iha servisu no fundu autónomu, ne’ebé ho totál alokasaun hamutuk $362.000 ba kategoria bens no serbisu no seidauk iha alokasaun ba kategoria seluk.

Maski nune’e, seidauk iha votasaun ba orsamentu Agência TATOLI.

Objetivu prinsipál ezisténsia Agência TATOLI maka sai fonte informasaun ofisiál ho produsaun informasaun ba públiku ho eskala nasionál, rejionál no internasionál ne’ebé ho karaktér multikanál, multimédia, multiplataforma no multitarefa.

Ba futuru, mídia plataforma online ne’e, sei bele dezenvolve no funsiona hanesan sentru produsaun sinema no dokumentasaun Estadu, hanesan institutu opiniaun públika, hanesan fórum informasaun públika, hanesan sentru jestaun arkivu no dokumentasaun Estadu no hanesan sentru formasaun no peskiza ne’ebé aplika ba komunikasaun.

Iha biban ne’e, orsamentu ba MAPKOMS pasa ho rezultadu afavór 45, kontra 2, no abstensaun 16, enkuantu orsamentu ba SEKOMS pasa ho rezultadu afavór 44, kontra 0 no abstensaun 21.

Alokasaun orsamentu ba MAPKOMS hamutuk millaun $3,131, kompostu hosi saláriu no vensimentu $675.000, bens no serbisu $842.000, transferénsia públika 1,614.

Orsamentu ba SEKOMS hamutuk millaun 1,237, kompostu hosi saláriu no vensimentu $209.000, bens no servisu $851.000, no transferénsia públika $177.000.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here