Governu aprezenta Proposta OJE 2020 ba datoluk iha faze jeneralidade ba loron dahuluk, iha sala plenáriu Parlamentu Nasionál. Imajen Tatoli/Egas Cristovão

DILI, 05 outubru 2020 (TATOLI)—Orsamentu tinan fiskál 2020 hosi Prezidénsia Repúblika no Parlamentu Nasionál aprovadu iha faze espesialidade loron dahuluk.

Proposta orsamentu Prezidénsia Repúblika (PR) nian ba tinan 2020 hamutuk millaun $6.004 no hosi montante orsamentu ne’e kontinua hametin identidade nasionál no mantein relasaun internasionál.

Proposta OJE 2020 hosi Prezidénsia Repúblika hamutuk millaun $6.044 komposta hosi saláriu no vensimentu rihun $996, bens no servisu millaun $4.961, transferénsia públika rihun $53, kapitál minór rihun $34, laiha kapitál dezenvolvimentu.

Hosi orsamentu millaun $6.044 ne’e koloka ba Gabinete Prezidente Repúblika  $ 500,000, Casa Civil hetan $4,805,990, Casa Militár hetan $737,798.  Ezekusaun orsamentu hosi Prezidente Repúblika hahú hosi janeiru to’o outubru 55.6%

Orsamentu hosi Rezidénsia Repúblika aprova ho rezultadu votasaun a-favór 43 kontra 7 no abstensaun 13.

“Orsamentu ba Prezidensia Repúblika nian pasa,” Prezidente Parlamentu Nasionál, Deputadu Aniceto Longuingos Guterres Lopes, anunsia liuhosi plenária Parlamentu Nasionál, segunda ne’e.

Iha proposta altersaun rua maibé pasa mak proposta ida-ne’ebé ko’a tiha viajen estranjeiru hodi prevee fali ba sosa karreta no mákina bee-moos nian.

Tuir dokumentu orsamentál ne’ebé prevee iha livru Planu Asaun Anuál (Livrus 2) nian hosi parte Prezidénsia Repúblika prioritiza Bem-Estar Sosiál, Protesaun Sosiál no Sidadania. Iha sidadania ne’e promove partisipasaun, patriotizmu no nasionalizmu.

Nune’e mós konsolida no fortalese defeza, seguransa iha relasaun esterna hanesan instituisaun defeza no seguransa, konsolida no fortalese justisa, demokrasia no direitu umanu no prioridade seluk hanesan dezenvolvimentu sustentável.

Medida prinsipál setoriál ba 2020 nian mak hanesan kontribui hodi reforsa identidade nasionál, liuhosi apoia promosaun língua Tétun Portuguesa, afirmasaun valór rezisténsia no valorizasaun patrimóniu nasionál.

Promove no defende Estadu Direitu Demokrátiku liuhosi koezaun no prestíjiu iha defeza no seguransa, no halo promosaun direitu umanu.

Iha medida prinsipál ne’e sei reforsa relasaun internasionál no diplomátika, liuhosi vizita nasaun seluk no organizasaun multilateral, promove dezenvolvimentu sustentável, dezignadamente liuhosi diálogu ho Prezidente Repúblika (Dada-lia ho Lu Olo), halo promosaun no apoiu polítiku ba dezenvolvimentu ekonómiku sustentável no apoiu prezervasaun ambientál no rekursu naturál.

Ikus liu, reforsa boa governasaun no jestaun institusionál servisu sira iha Prezidénsia Repúblika.

Iha parte seluk, orsamentu tinan fiskál 2020 hosi parlamentu Nasionál ho rezultadu votasaun af-avór 41, kontra 0 no abstensaun 19.

“Orsamentu ba Parlamentu Nasionál nian pasa,” Prezidente Parlamentu Nasionál, Deputadu Aniceto Longuinhos Guterers Lopes, anunsia liuhosi plenária PN, segunda ne’e.

Hosi montante orsamentu millaun $12.039.884 ne’ebé fahe ba saláriu no vensimentu millaun $5.556.507 (46,2%), bens no servisu millaun $5.124.540 (42,6%), kapitál menór rihun $96.919 (0,8%), kapitál dezenvolvimentu rihun $3.919 (0,03%) no transferénsia públika millaun $1.258.000 (10,5%).

Orsamentu millaun $12.039.884 ba Parlamentu Nasionál nian barak liu mak ezekuta ona liuhosi Dotasaun Temporáriu Orsamentál (DOT) hahú hosi janeiru to’o setembru no hela de’it fulan outubru, novembru no dezembru, tinan ida-ne’e.

Parlamentu Nasionál ne’ebé xefia hosi Deputadu Aniceto Longuinhos Guterres Lopes, sei promove partisipasaun sosiedade sivíl iha atividade parlamentár no lejizlativa nune’e atividade hotu bele la’o ho transparénsia iha desizaun polítika.

Parlamentu Nasionál hanesan órgaun soberania iha Repúblika Demokrátika Timor-Leste (RDTL), reprezentativu ba sidadaun hotu-hotu ho podér lejizlativa, fiskalizasaun no desizaun polítka bazea ba Konstituisaun RDTL artigu 92.

Bazea livru 2 (Planu Asaun Anuál) ne’ebé define medida prinsipál sira hosi Parlamentu Nasionál ba 2020 mak ezerse efetivamente funsaun konstitusionál Parlamentu Nasionál, reforsa kapasidade interna parlamentu nian, si hala’o ezekusaun ba funsaun fiskalizasaun asaun Governu nian no Administrasaun Públka.

Ba tinan 2020 ne’ebé hela de’it fulan outubru, novembru no dezembru kontinua implementa polítika jéneru iha Parlamentu Nasionál.

Nune’e mós promove kultura abertura no transparénsia iha Parlamentu Nasionál, inklui partisipasaun sosiedade sivíl iha atividade parlamentár no lejizlativa, nune’e sai transparente liu iha prosesu desizaun polítika sira no hala’o fiskalizasaun ba asaun governativa.

Medida prinsipál ikus liu mak reforsa governasaun di’ak, jestaun institusionál iha servisu sira Parlamentu Nasionál nian no reforsa kapasidade rekursu umanu.

Jornalista: Evaristo Soares Martins

Editor: Cancio Ximenes

HAKEREK NO HATÁN

Please enter your comment!
Please enter your name here