Primeiru-Ministru, Taur Matan Ruak, hamutuk ho membru Governu sira defende Proposta OJE 2020 iha debate faze Espesialidade, iha sala plenáriu. Imajen Tatoli/Egas Cristovão

DILI, 05 outubru 2020 (TATOLI)-Hahú janeiru to’o outubru tinan ne’e Governu uza Dotasaun Orsamentu Temporáriu (DOT) hodi finansia despeza Estadu tanba seidauk iha Orsamentu Jerál Estadu (OJE) 2020.

Tanba ne’e, iha 15 setembru Governu submete proposta orsamentu tinan ne’e ho montante biliaun $1,497.1, ne’ebé ezekuta ona ho forma duodedesimál no ezekusaun iha ámbitu surtu COVID-19 to’o loron 31 agostu 2020 ho valór totál millaun $600,4.

Despeza ba janeiru no setembru 2002 maka millaun $671 no previzaun despeza ba outubru maka millaun $117.

Tuir nota hosi Governu ne’ebé Agência Tatoli asesu iha segunda ne’e, bainhira OJE 2020 vigora maka projesaun ezekusaun ba despeza Estadu iha fulan novembru to’o dezembru 2020 maka millaun $708,7.

Despeza regulár ba novembru to’o dezembru millaun $136,9 ba LM/AA no instituisaun Estadu hotu, enkuantu despeza ba medida haat rekuperasaun ekonómika ba kurtu prazu millaun $113.

Medida haat kompostu hosi cesta bázika, medida retoma, medida dispensa kontributivu no medida apoiu ba traballadór informál sira.

Selu dívida mina, manutensaun no kombustível ba jeradór Eletricidade de Timor-Leste (EDTL) millaun $80, aleinde ne’e despeza ba Ministériu Obra Públika (MOP) ne’ebé sei ezekuta iha fulan rua ikus tinan ne’e maka fundu infraestrutura millaun $75 atu selu projetu ein kursu (la’o hela), selu dívida MOP millaun $56,1 nu’udar despeza regulár tinan kotuk tuir kontratu ne’ebé aprova ona hodi realiza pagamentu no fundu COVID-19 millaun $24 ba depeza ba mitigasaun.

Notísia Relevante: Balansu tetu orsamentu 2020 falta millaun $896,7 hosi biliaun $1,497.1

Despeza ba Rejiaun Administrativa Espesiál Oé-cusse Ambeno (RAEOA) no Zona Espesiál Ekonomia Sosiál Merkadu (ZEESM) millaun $76.

Pagamentu ba funsionáriu públiku hotu iha dezembru ba salariu désimu terseiru hamutuk millaun $17, kontribuisaun Estadu ba Seguransa Sosiál (pagamentu sei realiza hafoin OJE aprova) millaun $13,3.

Despeza ba kapitál dezenvolvimentu hosi liña ministeriál ne’ebé presiza selu iha tinan 2020 millaun $10, atu selu manutensaun ne’ebé durante DOT halo ona maibé la kobre ninia orsamentu tomak ho nune’e hafoin OJE aprova maka Ministériu Saúde bele halo pagamentu hamutuk millaun $3, pagamentu subvensaun ba partidu polítiku sira ne’ebé asentu parlamentar millaun $6,

Millaun $4,5 ba Planeamentu Desenvolvimentu Integradu Munisipál  (PDIM) ne’ebé atu halo pagamentu ba projetu ne’ebé la bele selu kompleta durante períodu DOT, pagamentu subvensaun ba Konferénsia Episkopál Timorense millaun $5, pagamentu ba taxa Banco Central de Timor-Leste (BCTL) ne’ebé durante tinan tolu la selu hamutuk millaun $4.

Dívida Ministériu Transporte Komunikasaun (MTK) ba internet ne’ebé fornese ba minitériu hotu millaun $3, pagamentu ró Nakroma II millaun $6,5, ne’ebé hanesan fundu kontrapartida ho Governu Alemaña, serbisu legál millaun $2, dívida Polísia Nasionál Timor-Leste (PNTL) atu selu kustu CCTV ne’ebé monta iha Dili laran no munisípiu hamutuk millaun $2,24.

Programa Nasionál Dezenvolvimentu Suku (PNDS) millaun $1 ba pagamentu projetu sira ne’ebé la kobre durante DOT, re-payment empréstimu millaun $2 ne’ebé atu selu filafali empréstimu sira Governu empresta ona, dívida ba Univercidade de Timor-Leste UNTL (UNTL), millaun $1,25 ba pagamentu dívida ba manutensaun no Timor Telecom

Finansia ba despeza iha g7+ millaun $1, pagamentu Serbisu Nasionál Kadastrál (SNC) $800.000 (retensaun porsentu 10), injesaun ba Banku Nasionál Komérsiu Timor-Leste (BNCTL, sigla portugés) millaun $5, finansia ba projetu melloramentu infraestrutura estrada nasionál millaun $60.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here