Ministru Asuntu Parlamentár no Komunikasaun Sosiál, Francisco Jerónimo, sai inspetór ba seremónia hasa’e bandeira iha Palásiu Governu, segunda (05/10). Imajen/SEKoop

DILI, 05 outubru 2020 (TATOLI)–Ministériu Asuntu Parlamentár no Komunikasaun Sosiál, Francisco Jerónimo, husu ba diretór jerál no nasionál sira atu kontrola funsionáriu sira iha oras serbisu hodi bele hala’o knaar didi’ak.

“Husu diretór sira atu superviziona, akompaña no fó motivasaun ba funsionáriu sira karik seidauk hala’o knaar ho di’ak hanesan funsionáriu públiku ne’ebé tama iha sistema, tanba ita iha ona sistema laran tenke halo sasán tuir regra no obriga ita tenke halo duni atu nune’e bele hetan avaliasaun ba funsionáriu sira ne’ebé maka halo serbisu,” tenik Ministru perante funsionáriu tomak iha Palásiu Governu, bainhira sai inspetór ba seremónia hasa’e bandeira, segunda ne’e.

Governante ne’e ko’alia asuntu ne’e tanba nota katak dala ruma iha oras serbisu nia laran funsionáriu sira atualiza rede sosiál.

“Ita mai la’ós halo serbisu loloos maibé ita mai tau status Facebook, loron-loron rame ho status. Hanesan fusionáriu Estadu ita iha obrigasaun no dever. Dever maka hanesan servidór Estadu tenke serví Estadu ne’e, bainhira ita serví ho di’ak maka ita sei hetan direitu,” nia fó hanoin.

Nia dehan, bainhira reprezenta Governu tuir sesaun plenária, membru Parlamentu Nasionál sira sempre kestiona kona-ba funsionáriu ikus mai barak.

“Bainhira ita ba Parlamentu, deputadu sira foti kestaun funsionáriu barak demais maibé problema maka forsa traballu tanba ita presiza ema atu halo serbisu, so que dala barak lakon kontrola. Ohin loron sasán iha atu fasilita ita maibé presiza uza tempu halo serbisu,” nia akresenta.

Membru ezekutivu ne’e hatutan, “Bainhira la’ós oras serbisu imi tau status avontade laiha problema maibé bainhira oras serbisu tenke foku tanba ita hakarak hatudu rezultadu.”

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here