Kazu omisídiu aman no oan iha Aldeia Labubu-Aidahu, Postu Administrativu Laclo, Munisípiu Manatuto to’o agora parte polísia seidauk identifika autór prinsipál ruma. Imajen/foti hosi Facebook

DILI, 05 outubru 2020 (TATOLI)- Kazu omisídiu  aman no oan iha Aldeia Labubu-Aidahu, Postu Administrativu Laclo, Munisípiu Manatuto to’o agora parte polísia seidauk identifika autór prinsipál ruma.

Notísia Relevante : Iha Laclo, aman ho oan mate, iha Same maun taa alin

Portavós Komandu Jerál Polísia Nasionál Timor-Leste (PNTL), Superintendente Xefe, Arnaldo de Araújo, informa parte investigasaun kriminál PNTL iha seidauk identifika ema ruma maka oho vítima, José da Costa ho nia oan mane.

PNTL rasik rekolla informasaun  hosi sasin sira, katak, deskonfia matebian, José da Costa maka oho nia oan, ikus mai nia rasik mós lori katana ko’a nia kakorok to’o mate, tanba problema família.

“Problema uma laran, tanba la’en ladún satisfás, ikus mai mosu problema ne’e,” dehan Komandante Arnaldo ba jornalista, ohin, liuhosi konferénsia imprensa iha Komandu Jerál PNTL, Caicoli, Dili.

 Tuir kronolojia ne’ebé PNTL rekolla iha dadeer  tuku 6:00, matebian José da Costa haksesuk malu ho nia kaben, nune’e mosu dezentendimentu, ikus mai, matebian ba foti katana iha uma-laran ho nervozu taa uluk ninia oan mane nia kakorok to’o mate kedas iha sira-nia varanda oin, no José da Costa  mós foti fali katana hodi ko’a rasik ninia kakorok to’o monu latan iha uma-oin.

Akontesimentu ne’e halo, vítima nia família inklui viziñu sira ne’ebé haree ho matan trauma hodi kontaktu kedas Polísia Munisípiu Manatuto to’o fatin konsege evakua vítima José da Costa ba ospitál, maibé la konsege salva nia vida, tanba vítima nia kakorok kanek provoka raan sai maka’as.

Portavós PNTL mós informa,  suspeitu ida ne’ebé lori katana taa ninia alin, vítima  Estevão Corte Real Leong ho tinan 40  Aldeia Rialau, Suku Letefoho, Postu Administrativu Same, Munisípiu Manufahi ninia kazu aprezenta ona ba Ministériu Públiku hodi prosesa ona autór ba Tribunál.

Suspeitu taa kanek ninia alin Estevão nu’udar mós doutór ida hosi Munisipiu Manufahi rezulta kanek maka’as iha oin.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here