Osan Dolar Amerikanu. Imajen/Google

DILI, 05 outubru 2020 (TATOLI)-Arguidu ho inisiál LS nu’udar emprezáriu ida, ohin, tenke ba tur iha sala julgamentu Tribunál Distritál Dili (TDD) hodi hatán ba aktu empresta osan hosi lezadu APG hodi halo projetu Estadu.

Notísia Relevante : Deve $200 la fó fila, QD taa Fernando dos Santos

Faktu ne’ebé arrola hosi Ministériu Públiku (MP) katak, iha loron la apartadu fulan jullu 2012, arguidu LS halo konkordánsia hodi asina kontratu empréstimu osan lezadu APG ho montante $3,000,00, durante fulan tolu arguidu sei selu fali ho osan funan porsentu 18, maibé ikus mai arguidu la kumpre nia obrigasaun hodi selu fali tuir tempu ne’ebé termina ona entre parte rua.

Iha tempu barak lezadu ezije maka’as hodi husu arguidu, maibé arguidu la entrega nafatin. Ho nune’e, MP akuza arguidu ho krime borla agravadu.

Hatán ba akuzasaun hirak ne’e arguidu LS deklara ba Tribunál katak, faktu sira ne’e loos hotu, maibé nia parte iha tempu hirak liubá entrega fila-fali ona osan lezadu nian ho montante $3,000,00  ba lezadu.

Nia dehan, momentu ne’ebá nia parte labele selu lalais osan ne’ebé empresta tanba iha difikuldade finanseira.

“Ha’u empresta osan ne’e atu sosa material balun ba projetu Estadu ne’ebé ha’u ka’er halo konstrusaun uma sentru saúde iha Makadiki, Uatolari, Viqeuque ho nune’e prosesu pagamentu ne’ebé tarde hosi parte Governu, nune’e difikulta mós labele selu lalais,” hateten arguidu iha sala audiénsia.

Lezadu APG konfirma katak, osan inan ne’ebé arguidu foti selu fali ona no iha momentu ne’eba nia parte hato’o keixa ne’e ba MP tanba ta’uk nia osan lakon, mezmu nune’e prosesu kazu ne’e rekorre tama ona Tribunál.

Kona-ba osan funan porsentu 18 to’o agora arguidu seidauk selu, lezadu ne’e lia tun dehan, nia parte lakohi ezije depende de’it ba konsiénsia hosi arguidu nian.

Hafoin rona tiha parte sira, tama kedas ba alegasaun hosi Ministériu Públiku haree ba faktu sira hotu prienxe duni elementu krime husu Tribunál atu kondena arguidu ho pena prizaun tinan-rua (2) no suspende ba tinan-rua (2), nune’e halo prevensaun iha futuru arguidu labele komete tan krime hanesan.

Tribunál deside adia fila-fali julgamentu ne’e ba iha loron 20 novembru 2020 iha tuku 17:00 Otl, hodi rona leitura akórdaun.

Prosesu julgamentu ne’e prezide hosi juis koletivu Afonso Carmona, Albertina Neves, Ercilia da Costa, Ministériu Públiku reprezenta hosi Prokudór Renato Berenahac no arguidu hetan asisténsia legal hosi Defensór Públiku.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here