Dirasaun Nasional Transporte Terrestre Munisípiu Viqueque hamutuk ho DNTT nasionál, ohin, hala’o teste ba motorista hamutuk ema 2000-resin. Imajen/Memensio Sequeira Freitas.

VIQUEQUE, 05 outubru 2020 (TATOLI)—Dirasaun Nasional Transporte Terrestre Munisípiu Viqueque hamutuk ho DNTT nasionál, ohin, hala’o teste ba motorista hamutuk ema 2000-resin ne’ebé hola fatin iha Betisin iha korridór Eskuadra PNTL Munisipiu Viqueque. Programa teste refere fahe ba grupu rua bazea ba alfabetu naran nian, hosi A to’o J sei hala’o durante semana ida, hahu hosi loron 5 to’o loron 10 fulan ida ne’e no hosi inisiál L to’o Z sei realiza hosi loron 12 t’o 17 fulan ida-ne’e.

Diretór DNTT Munisípiu Viqueque, José de Sousa, hateten ema hamutuk rihun rua resin mak rejistradu ona atu tuir teste refere ne’ebé nia prosesu ne’e hahú kedas hosi 2017 mai to’o 2020. Dokumentu sira ne’ebé ezaminandu sira, tuir nia, presiza prenxe mak hanesan fotokopia kartaun Eleitrorál tahan ida, fotografia meiu korpu 3×4 tahan ida, atestadu médiku ne’ebé asina hosi médiku ezaminadór no Diretór Servisu Saúde Munisípu Vikeke no Invoice hosi BNCTL kona-ba selu $5 ba teste Karta Kondusaun refere.

Motorista sira rona instrusaun atu tuir teste ba hetan Karta Konsudaun. Imajen/memensio Sequeira Freitas.

Diretór ne’e haktuir, teste refere sei la’o durante semana rua nia laran ho tarjetu kada loron ida sei fó ezame ba motorista hamutuk 300 tuir alfabetu naran nian. Nia dehan, ba sira ne’ebé foin mak atu rejistu mós, DNTT Munisípiu Viqueque sei fasilita atu sira bele tuir uluk ezame eskrita molok ba teste iha roda laran. Ba hirak ne’ebé pasa ona ezame eskrita iha tinan hirak liu ba ne’e, automátikamente tama kedas ba iha teste prátika hafoin indika dokumentu sira ne’ebé nesesária.

Oras ne’e daudaun, nia dehan, sidadaun sira liuliu sira ne’ebé lori motor no kareta preukupadu ho pasa revista ne’ebé polísia tranzitu sira halo tuir estrada sira hodi kontrola movimentu veíkulu iha teritóriu laran tomak. Lei Kódigu Estrada Dekretu Lei nú 6/2003 no Lei Kódigu Penál nú. 19/2009, ejize ema hotu-hotu ne’ebé lori kareta no motor iha obrigasaun atu iha Karta Kondusaun.

Kleur tebes ona mak motorista sira iha Munisípiu Viqueque prosesa sira-nia dokumentu atu hetan Karta Kondusaun legalmente hosi DNTT munisípiu nian maibé tanba situasaun impase polítika no propagasaun COVID-19 ne’ebé mosu implika ema barak labele trata dokumentu importante refere to’o agora.

Entretantu, Motorista Manuel Hornai sente haksolok ho teste refere tanba bele fó oportunidade atu sira bele iha Karta Kondusaun tuir dekretu Lei ne’ebé vigora. Tanba durante ne’e, nia dehan, komu sira la iha Karta Kondusaun entaun sira lori sira-nia motor ka kareta hanesan ema “na’ok-teen” ne’ebé halai iha dalan tenke hafuhu polísia tranzitu sira ne’ebé halo pasa revista tuir estrada sira iha territóriu laran tomak.

Teste refere hala’o ho kolaborasaun hamutuk entre DNTT nasionál, DNTT munisípiu Viqueque hamutuk ho membru polísia tranzitu Munisípiu Viqueque. Mezmu loron manas maibé ezaminandu sira la baruk atu hein sira-nia parte ba tuir teste. Ba sira ne’ebé liu teste, automátikamente sei hetan Karta Kondusaun provizória to’o emite Karta Kondusaun orijinál. Enkuantu ba sira ne’ebé falla karik iha teste ne’e, karik sei hetan tan oportunidade daruak atu sira bele hetan mós Karta Kondusaun tuir Lei haruka.

Kontribuidór: Memensio Sequeira Freitas

Editór: Cancio Ximenes

HAKEREK NO HATÁN

Please enter your comment!
Please enter your name here