Profesór sira iha ESG 5 de Maio Becora. Foto: https://esg5demaio.wordpress.com/

DILI, 05 outubru 2020 (TATOLI)-Ekipa Dezenvolvimentu Kompaktu (CDT-sigla inglés) sei apoia polítika Ministériu Edukasaun Juventude no Desportu (MEJD) liuhosi estabelesimentu Instituisaun Sentru Formasaun Ekselente (ICFE-sigla portugés)  hodi reforsa kualidade manorin-na’in sira iha ámbitu formasaun ekselente molok sira asume responsabilidade iha nivél estabelesimentu ensinu sira.

“Ita apoiu planu MEJD nian atu estabelese ICFE ne’e atu apoiu ita-nia profesór  sira tantu sira ne’ebé hanorin kle’ur ona no sira ne’ebé foun atu sai duni profesór ne’ebé ekselente duni,”  Diretór Ezekutivu CDT, Constáncio Pinto, kompromete perante jornalista sira iha Sentru Nasionál Chega Balide Dili, segunda ne’e.

Diretór Ezekutivu Nasionál Compact Developmement Team Timor-Leste (CDT-TL), Constâncio Conceição Pinto. Imajen Tatoli/Egas Cristóvão

“Ita la ko’alia imediatamente maibé ita ko’alia  ba tinan lima oin mai,”Ezekutivu ne’e reforsa.

Diretór Constâncio Pinto, esplika manorin-na’in sira ne’e iha kategória rua hanesan sira ne’ebé hanorin ona antes ne’e no sira ne’ebé finalista iha ensinu superiór atu ba hanorin iha eskola sira.

Tan ne’e planu estabelese ICFE, tuir nia, atu apoiu manorin na’in sira hodi bele hetan formasaun ida adekuadu no ekselente molok envolve aan iha prosesu ensinu aprendizajen ba estudante sira.

Iha fatin hanesan Diretór Jerál Ensinu Sekundária, Deolindo da Cruz, hateten Planu Estratéjiku Dezenvolvimentu Nasionál (PEDN) ne’e parte dahuluk mak hahú ona ho formasaun ba numeradór sira ne’ebé hetan apoiu husi ONG BELUN no Internasional  Bussines and Technical Consultants Inc (IBTCI) husi Estadu Unidus Amérika (EUA).

Apoiu sira ne’e  sei tulun MEJD atu dezeña planu no programa ba tinan lima oin mai programa prioridade ida mak  atu estabelese Instituisuan Sentru Formasaun ba Manorin sira.

Polítika Oitavu Governu Konstitusionál, ne’ebé aprovadu iha Konsellu Ministru iha loron 20 jullu 2018, iha pajina 14 kona-ba edukasaun no formasaun deskreve katak Governu sei:

  1. Reforma jestaun no administrasaun iha Sistema Edukativu, iha nível Ministériu Edukasaun, Munisipál no mós iha eskola, inklui definisaun ba prosedimentu ne´ebé adekuadu no ba sistema monitorizasaun no avaliasaun;
  2. Haforsa kondisaun atu labarik sira, ho tinan entre tolu to´o lima, bele hetan asesu ba preparasaun ba ensinu báziku obrigatóriu, inklui edukasaun pré-eskolár, ne´eb’e besik sira-nia hela fatin. Asegura mós, partisipasaun konkreta husi komunidade edukativa;
  • Haforsa (ka hametin) kondisaun ba Ensinu Báziku ne´ebé universál, obrigatóriu no gratuitu, ho kualidade ne´ebé di’ak duni. Ensinu Báziku sei sai nu’udar sentru hodi aprende atu koñese, aprende atu halo, aprende atu moris ho ema seluk no mós aprende atu forma nia aan rasik. Iha idade ho tinan neen, labarik hotu-hotu sei hetan asesu ba Ensinu Báziku ida ho kualidade, ho akizisaun ba kompetênsia ne’ebé maka’as iha matemátika no iha literasia, iha lian (ka língua) ofisiál, ho mós kompeténsia bázika iha lian inglés, hanesan lian estranjeiru, nune´e mós kompetênsia iha valór fundamentál husi identidade nasionál, husi historia no mós husi kultura timor-nian;
  1. Reforsa kondisaun ba Ensinu Sekundáriu ida, iha ne´ebé estudante sira bele hetan asesu ba koñesimentu sientífiku, umanístiku no mos tékniku. Alunu sira sei aprende atu aplika koñesimentu hirak ne´e, iha setóres produtivus País-nian, hodi prepara sira atu tama ba merkadu traballu ka atu kontinua sira-nia estudu superiór, universitariu ka politékniku. Governu sei kontinua fó opsaun rua: Ensinu Sekundáriu Jerál ka Ensinu Sekundáriu Tékniku-Vokasionál;
  2. Asegura atu estudante sira ne´ebé tama iha Ensinu Superiór, bele prontu atu fó resposta ne´ebé loos liu, iha merkadu traballu, hodi asegura asesu ne´ebé hanesan ba ema hotu no haforsa mekanismus akreditasaun nian no avaliasaun ba kualidade iha nível ensinu ida ne’e;
  3. Reforsa oportunidade ba hirak ne´ebe hakarak estuda no hakléan sira-nia koñesimentu, liliu sira ne´ebe vulnerável liu, no sira ne´ebé hasoru dezafiu boot, liuhusi programa edukativu ne´ebe atraente no flexível, baseia ba metodolojia ne´ebé ho kualidade ba ensinu ba ema adultu.
  • Moderniza no hodi assegura importánsia ne’ebé boot, iha esforsu ba formasaun profesionál kontínua, hodi haforsa padraun efetividade ne’ebé tenki di’ak, hanesan mentoria no akompañamentu, no uza informátika no teknolojia ba informasaun, materiál multimédia no aprendizajen distânsia’ (ka husi dook) atu asegura dosente ho kualidade, preparadu atu forma futuru Timor-Leste nian;
  • Kontinua dezenvolve rekursu umanu nasionál, liuhusi programa, estratéjia no investimentu plurianuál. Fundu Dezenvolvimentu Kapitál Umanu sei kontinua kontribui ba dezenvolvimentu iha Edukasaun no Formasaun Profisionál ba foinsa’e no adultu sira, ho forma ne´ebé transparante no koordenadu, no ho baze iha identifikasaun ba área koñesimentu no abilidade ne´ebé sei falta liu;
  1. Konsolida Komisaun Nasionál Edukasaun (CNE), nu’udar mekanizmu ba promosaun diálogu inkluzivu no partisipativu, entre parte interessada iha setór edukativu, no koordenasaun ne’ebé diak entre Ministériu Edukasaun ho sosiedade sivíl no setór privadu no mós ho parseiru dezenvolvimentu nasionál no internasionál;
  2. Haklé’an programa iha edukasaun inkluziva, hodi promove kultura kona-ba respeitu ba diversidade, hodi rekoñese talentu oioin no mós kapasidades oioin, husi ema hotu, atu nune´e bele promove susesu ba alunu sira no, efetivamente, posibilita sira atu hetan futuru hanesan sidadaun ne´ebé hetan respeitu husi komunidade tomak, no asegura edukasaun ne´ebé orienta liu ba alunu, nu’udar realidade lorloron, ne’e hotu nu’udar prinsípiu-xave ba polítika edukativa;
  3. konsolida lían Tetun hodi garante padraun ida ba nia uzu, no promove nia uzu iha estabelesimentu ensinu sira, iha área oioin Governu nian, iha mídia no ba populasaun hotu. Nune´e, Governu kompromete atu haka’as liután iha implementasaun Planu Estratéjiku Nasionál Edukasaun (2011-2030), atu nune´e bele alkansa metas hirak tuirmai, iha tinan lima oin mai.

Jornalista  : Tomé Amado

Editór : Agapito dos Santos

HAKEREK NO HATÁN

Please enter your comment!
Please enter your name here