Logotipu TDD. Imajen Tatoli/Egas Cristóvão

DILI, 05 outubru 2020 (TATOLI)-Arguidu ho inisiál GAGR, ohin, hahú marka prezensa iha sala audiénsia Tribunál Distritál Dili (TDD) relasiona ho kazu asidente tráfegu iha estrada diresaun Bemori, Dili, iha tinan 2018.

Juis prosesu Afonso Carmona hateten, tuir loloos ajenda ohin hala’o julgamentu hodi rona deklarasaun arguidu no sasin sira nian, maibé arguidu ida seluk ho inisiál ASR la marka prezensa, nune’e nia parte deside adia fila-fali julgamentu iha hafoin loron 100 ba oin.

Ministériu Públiku liuhosi Prokuradór Rogério Viegas husu pedidu ba Tribunál atu hasai notifikasaun ida ba arguidu refere dentru loron lima atu fó justifikasaun razaun la marka prezensa no bainhira laiha resposta husu atu aplika multa no detensaun hodi asegura ba prosesu julgamentu tuir mai.

Tuir informasaun ne’e jornalista Agência Tatoli asesu hosi parte Ministériu Públiku (MP) kazu ne’e rejista ho númeru prosesu NUC.0382/18.TRDIL.

Natureza kazu ne’e relasiona ho akontesimentu asidente tráfegu iha area kruzamentu estrada ba Bemori, Dili, iha tinan 2018.

Arguidu GAGR kondús karreta marka ford ranger xapa matrikula 29-121 TL no arguidu ASR kondús mós karreta ka bis ho xapa matrikula 37-949 TL soke malu, hodi rezulta vítima Merlinda Gusmão Moreira mate kedas iha fatin no pasajeiru sira seluk hanesan Rita Sarmento, Guido Correia, Sedelusio Correira, Cosme Correira ho Nazario Correira hetan kanek todan.

Kazu ne’e MP promove arguidu GAGR, nu’udar autór material ho forma konsumada ba iha konkursu real ba krime omisídiu neglijente ho kondusaun perigoza ne’ebé previstu no punidu iha artigu 140 no 209 kódigu penal Timor-Leste.

Arguidu ASR, nu’udar autór material ho forma konsumada ba krime kondusaun sem karta ne’ebé previstu no punidu iha artigu 207 kódigu penal Timor-Leste.
Kona-ba akuzasaun kompletu Tribunál seidauk lee sai kompletu tanba adia fila-fali julgamentu ne’e ba loron seluk.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here