Matebian Ajente Prinsipál Abel Vicente Tilman, membru UPF. Imajen/Espesiál

DILI, 05 outubru 2020 (TATOLI)- Komandu Unidade Patrullamentu Fronteira (UPF) lakon membru di’ak ida, Ajente Prinsipál Abel Vicente Tilman (33) ne’ebé mate tanba sofre ataque cardíaco” ka ataka kurasaun.

Matebian Abel Vicente Tilman, derrepente deit sofre “ataque cardíaco” bainhira hala’o hela servisu iha Departamentu Justisa Kuartél UPF iha Batugade, Munisípiu Bobonaro, domingu (04/10/2020).

Matebian moris iha suku Betanu, Postu Administrativu Same, Munisípiu Manufahi. Hahú ninia servisu iha Departamentu Justisa UPF iha 2013 to’o mai hakotu nia iis.

Komandante UPF Superintendente, João Sancho Pires, haktuir, nia parte sente triste tebes, tanba lakon ajente prinsipál ne’ebé sofre “ataque cardíaco”  derrepente iha servisu laran, no ekipa UPF lori kedas nia ba hala’o tratamentu saúde iha Ospitál Postu Administrativu Balibo, maibé ekipa médiku sira la konsege salva nia vida.

“Moras ataka derrepente iha servisu fatin, ha’u orienta ekipa operasaun lori kedas ba ospitál Balibo, maibé to’o ne’ebá doutór ko’alia katak, nia sofre fuan,” informa Komandante UPF, Superintendente  João Sancho Pires, ohin, ba  jornalista iha Kuartél Jerál PNTL, Dili.

Daudaun ne’e Komandu Jerál PNTL fó ona orientasaun ba Komandu UPF koordena ho família sira hodi hala’o serimónia funerál iha matebian nian moris fatin Betanu iha tersa aban (06/10/20).

“Ami lori matebian ba ona Betanu, aban maka sei halo funerál,” nia hateten hodi lia tun tan dehan,  Komandu UPF mós aprezenta ona lista ba Komandu Jerál PNTL atu kontinua trata matebian ninia direitu tuir lei seguransa sosiál hodi fó direitu ne’e ba nia kaben no oan sira.

Portavós PNTL, Superintendente Xefe, Arnaldo de Araújo deklara, PNTL sente lakon membru di’ak ida ne’ebé tinan barak hamutuk ho nia kolega sira dedika nia aan ba Instituisaun PNTL.

“Komandu Jerál PNTL lakon nia membru di’ak ida ne’ebé hakotu nia iis iha  tuku 6:00 dadersán, domingu foin lalais ne’e,” tenik nia.

Arnaldo dehan, Komandu Jerál rasik hasai ona orientasaun ba komandante unidade no komandante munisípiu no membru sira atu tau konsiderasaun aas, bainhira sofre moras tenke halo tratamentu ba saúde hodi evita membru sira labele sofre moras derrepente iha servisu.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here