Debate proposta OJE 2020 iha faze jeneralidade iha sala plenáriu. Imajen Tatoli/Egas Cristovão

DILI, 05 outubru 2020 (TATOLI)—VIII Governu Konstitusionál introdús ona planu rekuperasaun ekonómika kurtu prazu ba medida haat ne’ebé implementa hahú jullu to’o dezembru 2020 ho totál despeza millaun $113,4.

Despeza ne’e alokadu iha proposta Orsamentu Jerál Estadu (OJE) 2020 ba verba Ministériu Koordenadór Asuntu Ekonómiku (MKAE) maibé iha diskusaun faze espesialidade ba loron daruak, mosu proposta hosi deputadu bankada Governu hodi muda despeza ba programa haat ne’e ba fundu COVID-19.

Proposta númeru ualu ne’ebé aprezenta hosi proponente sira pasa ho votu a-favór 44, kontra 0, abstensaun 17.

Aleinde ne’e, aprova mós orsamentu ba MKAE ho votu a-favór 45, kontra 0, abstensaun 16, ho nune’e orsamentu ba ministériu ne’e hetan redusaun no agora ho montante $716.000, hosi alokasaun inisiál millaun $113,739, kompostu hosi saláriu no vensimentu $56.000, bens no servisu millaun $4,653 no transferénsia públika $109.030.

Ministru Koordenadór Asuntu Ekonómiku, Joaquim Amaral, esplika despeza ne’ebé aloka ba orsamentu ministériu koordenadór ne’e sei transfere ba fundu COVID-19 ne’ebé deskreve kategoria bens no servisu no transferénsia públika.

“Proposta ne’e simplesmente atu ajuda Governu ezekuta osan ho lalais, nune’e ministériu implementadór sira bele asesu ba orsamentu ne’e bainhira tau iha kategoria fundu COVID-19,” tenik Ministru Joaquim iha sala plenáriu Parlamentu Nasionál (PN), segunda ne’e.

Notísia Relevante: Rekuperasaun ekonómika: prevee millaun $113,4 ba medida haat kurtu prazu

Orsamentu ne’ebé tranzita hosi MKAE ba fundu espesiál ne’e, aloka millaun $45,5 ba transferénsia públika, ne’ebé sei transfere millaun $42 ba Institutu Nasionál Seguransa Sosiál (INSS) iha Ministériu Solidaridade Sosiál no Inkluzaun (MSSI) hodi finansia medida tolu rekuperasaun ekonómika, destina ba empreza no traballadór sira ne’ebé hala’o atividade iha setór informál.

Enkuantu medida seluk maka cesta bázika ho totál despeza millaun $71, ne’ebé destina ba sidadaun hotu ne’ebé kada ema sei hetan $25.

Prezidente komisaun C (finansa públika) no proponente ba proposta númeru ualu, Maria Agélica, fundamenta proposta ne’e mósu tanba hetan rekomendasaun hosi komisaun tanba haree MKAE ninia natureza atu halo liña koordenasaun ba ministériu sira no orsamentu ne’ebé prevee atu halo rekuperasaun ekonómika tuir programa.

“MKAE simplismente koordena kestaun ekonómiku ne’ebé ministériu sira iha kompeténsia jurídika atu implementa osan ne’e,” akresenta Deputada bankada FRETILIN ne’e.

Tanba ne’e maka orsamentu ba programa COVID-19 bazeia ba proposta hosi ministériu no alokadu iha fundu COVID-19hodi bele jere.

“Kona-ba kapasidade ezekusaun, tanba hanesan fundu espesiál ho ninia natureza rasik no iha autononia finanseira maka bele implementa didi’ak programa sira ne’ebé introdús, tanba ne’e ami hanoin MKAE hanesan ministériu atu koordena liña ministeriál ne’ebé iha kapasidade jurídika atu implementa rekuperasaun ekonómika,” nia akresenta.

Deputadu bankada FRETILIN, Antoninho Bianco, argumenta komponente ne’e maka atu reforsa fundu ne’ebé prevee ba kombate moras maibé programa ba rekuperasaun ekonómika la tama fundu espesiál ne’e.

“Despeza medida haat rekuperasaun  ekómika ne’e iha relasaun ho fundu COVID-19, tanba ne’e presiza  halo transferénsia públika hosi MKAE ba fundu atu alarga ba komponente ne’ebé la’ós de’it atu atu kombate no prevene moras maibé mós ba medida rekuperasaun ekonómika,” nia akresenta.

 Nune’e mós, Deputadu Bankada CNRT, Patrocínio António, konsidera bainhira estabelese fundu COVID-19 tanba momentu ne’ebá laiha orsamentu normál no laiha meiu atu halo intervensaun atu moras, entaun Governu aproveita kria fundu.

“Polítika rekuperasaun ekonómika ita hakarak introdús ona iha proposta OJE, maibé tanba saida tenke hasai no tau fali iha ministériu lubuk ida ne’ebé sira rasik iha sira-nia orsamentu no prevee ona saida maka presiza atu halo iha tinan ne’e,” argumenta Deputadu bankada opozisaun ne’e.

Nia hatutan: “Orsamentu iha ministériu ketak ida maka obriga tau iha ministériu seluk atu ezekuta enkuantu ministériu sira iha rasik iha orsamentu liga ho polítika rekuperasaun ekonómika.

Deputadu António da Conceição, konsidera kestaun transferénsia ne’e presiza tetu tanba Ministériu Asuntu Ekonómiku hanesan ministériu ne’ebé iha kompeténsia atu koordena tanba ne’e presiza rekursu.

“Fundu COVID-19 importante atu bele reforsa maibé presiza define montante iha MKAE atu bele garante asesibilidade ministériu sira ne’ebé asume portafóliu ligadu ba asuntu ekonomia hanesan Sekretaria Estatu Kooperativa (SEKoop), Ministériu Turizmu, Komérsiu no Indústria (MTKI), Ministériu Agrikultura no Peska (MAP) ne’ebé iha alokasaun orsamentu kiik maibé hanesan instrumentu polítiku di’ak atubele reforsa minitériu tékniku sira ninia kapasidade,” Deputadu bankada opozisaun ne’e fó hanoin.

Nia nota, orsamentu ne’ebé alokadu ba fundu COVID-19 orientadu ba impaktu moras ne’e.

“Rekuperasaun ekonómika la nesesáriu sei osan ne’e ba de’it fundu COVID-19, ita iha impaktu barak tanba ne’e presiza iha mekanizmu atu posibilita ministériu tékniku sira,” nia akresenta.

Jornalista: Natalino Costa

 Editora: Julia Chatarina

HAKEREK NO HATÁN

Please enter your comment!
Please enter your name here