Imajen TATOLI/Zezito Silva.

DILI, 04 outubru 2020 (TATOLI)–Liuhosi reuniaun alargada ne’ebé Lautém-oan sira realiza iha salaun Eskola Cristal, Balide, sábadu ne’e, partisipante sira hili Pedrinho De Carvalho Fernandes sai Prezidente Komisaun Permanente ba rekonstrusaun Uma Tradisionál Lautém.

Notísia Relevante: Uma Tradisionál Lautém reprezenta Timor-Leste iha mundu

Iha estrutura ba Komisaun Permanente ida-ne’e kompostu hosi Prezidente, Primeiru Vise-Prezidente Estevão Carvaleiro, Segundu Vise-Prezidente João dos Santos, Terseiru Vise-Prezidente Novencio do Carmo Vieira, Tezoreiru Ferderita Alita Miranda, Primeiru Sekretáriu Thomas Eli Timor no Segundu Sekretáriu Carlito da Costa.

“Ita hotu hatene katak uma tradisionál Lautém hatudu kondisaun símbolu unidade ne’ebé besik atu monu tanba harii tinan barak ona maibé laiha manutensaun. Situasaun ne’e ezije Lautém-oan sira-nia responsabilidade atu asegura símbolu unidade no fraternidade Leutém-oan sira hamriik metin fila-fali,” dehan Prezidente Eleitu, Pedrinho Fernandes, hafoin eleitu iha votasaun demokrátika refere, foin lalais ne’e. 

Tuir Prezidente Eleitu, fundu ne’ebé atu halo rekonstrusaun uma tradisionál Lautém sei halibur hosi ekipa komisaun permanente liuhosi fubdu angariasaun ne’ebé servisu hamutuk ho autoridade munisipál no komunidade tomak hafoin realiza atividade.

Nia informa, iha 25 Jullu 2020, joven Lautém-oan sira iha inísiativa hahú halo enkontru iha Jardin Borja da Costa hodi halo dikusaun kona-ba kestaun no preokupasaun komunidade Munisípiu Lautém nian kona-ba kondisaun uma tradisionál ne’ebé durante ne’e ho kondisaun aat no abandonadu.

Bazea ba enkontru ne’ebé mak estabelese iha dia 25 Jullu 2020, no kontinua realiza segundu enkontru hodi kontinua halo diskusaun iha loron 11 agostu 2020 no iha loron ne’e kedas halo ona konferénsia imprensa ba públiku.

Terseiru enkontru, nia dehan, halo iha loron sábadu loron 15 agostu 2020 hodi forma komisaun preparatoriu eventuál iha salaun Assosiasaun HAK hodi fahe tarefa servisu ho nia divizaun sira ba planu primeiru enkontru ba estabelesimentu komisaun Angariasaun fundu ba rekonstrusaun uma tradisionál Lautém ne’ebé tuir planu sei realiza iha sábadu loron 22 agostu 2020. Iha loron ida-ne’e konsege harii komisaun rua hanesan Steering Committee no Organizing Committee.

Depois iha loron 16 agostu 2020, kontinua halo enkontru hodi hametin preparasaun iha Delta II, Comoro, Dili, iha Costa Escollano Brandão nia uma hodi dezenvolve sasán tuir mai:

Kria estrutura Terms of Reference (ToR), esbosu finál ToR, istória uma tradisionál Lautém ho naran “Lee Jiaval”, identifika membru Konsellu Konsultivu ba Komisaun no fahe knaar no responsabilidade ba ida-idak nia divizaun iha komisaun refere.

Iha Konstituisaun RDTL artigo 59 mós sei fó dalan ba kultura Timor atu nune’e jerasaun foun bele rekoñese no valoriza nafatin liman rohan ka eransa bei’ala sira-nian. Estadu mós sei konsidera no valoriza nafatin nu’udar patrimóniu Estadu nian. 

Konstituisaun RDTL fó dalan nafatin ba sidadaun Timor-Leste katak sidadaun ida ne’ebé mak iha kbiit atu harii ka rekonstrusaun uma tradisionál ida, lei inan sei fó dalan ba sidadaun ne’e tanba Estadu sei rekuñese katak uma-lisan ne’e mós sai reprezenta simbolu nasionál no internasional iha mundu.

Jornalista: Zezito Silva

Editór: Cancio Ximenes

HAKEREK NO HATÁN

Please enter your comment!
Please enter your name here