Primeiru-Ministru, Taur Matan Ruak hamutuk ho Membru Governu Sira, Debate iha Jeneralidade ba Orsamentu Jeral Estado 2020, iha Sala Plenáriu PN, sesta (02/10). Imajen Tatoli/Egas Cristovão

DILI, 04 outubru 2020 (TATOLI)—Hafoin termina tiha prinsípiu no sistema orsamentu iha faze jeneralidade, aban, VIII Governu Konstitusionál lideradu Primeiru-Ministru Taur Matan Ruak, sei defende rúbrika orsamentál iha debate espesialidade ne’ebé foka ba artigu ida-idak hosi proposta-lei orsamentu 2020.

Iha loron sesta ne’e, reprezentante povu sira iha uma fukun Parlamentu Nasionál aprova proposta Orsamentu Jerál Estadu (OJE) 2020 iha faze jeneralidade ho despeza biliaun $1.497,1 ho rezultadu votasaun a-favór 44 , kontra 0 no abstensaun 21.

Montante orsamentu biliaun $1.497,1, ne’ebé prevee ba saláriu no vensimentu millaun $206,7, bens (sasán) no servisu millaun $499,3, transferénsia públika millaun $568,7, kapitál minór millaun $8,9 no kapitál dezenvolvimentu millaun $213,4.

Montante orsamentu biliaun $1.497,1 ne’e Governu ezekuta hahú hosi janeiru to’o 31 agostu 2020 hamutuk millaun $600,4 liuhosi Dotasaun Temporáriu Orsamentál (DOT) no resta orsamentu hela millaun $896,7.

Membru Komisaun C (Finansa Públika), Deputada Maria Fernanda Lay, hateten deputadu sira la aprova livru 2 (planu asaun anuál), livru 4A no livru 4B (rúbrika orsamentál) tanba tabela orsamentu sala ka errata.

Eis Prezidente Komisaun Finansa Públika ne’e lamenta Unidade Planeamentu, Monitorizasaun no Avaliasaun (UPMA) ne’ebé la deteta errata ne’e.

“Ha’u lamenta instituisaun balun proposta sei mosu iha espesialidade, até própriu ministériu la hatene sira-nia instituisaun balu osan lato’o para selu saláriu no vensimentu, mai husu ba deputadu sira halo proposta atu tau osan. Entaun, iha momentu halo orsamentu la hanoin ida-ne’e. Ita-boot sira hatene reseita própria lato’o, ne’e mak dezafiu boot ba ita,” membru Komisaun C ne’e levanta iha plenária iha debate jeneralidade foin lalais ne’e.

Iha debate faze espesialidade, aban, sei konvoka Rejimentu Parlamentu Nasionál (RPN) artigu 108 (diskusaun no votasaun iha espesialidade) hodi orienta deputadu sira hala’o diskusaun no votasaun iha espesialidade ba matéria ne’ebé temi iha númeru 2 no 3 hosi artigu 95 Konstituisaun RDTL iha plenáriu.

Alínea 2 hosi artigu 108 ne’e orienta deputadu sira tuir rekerimentu hosi deputadu ida ka liu, plenáriu bele delibera atu diskusaun no votasaun iha espesialidade ba proposta ka projetu-lei ne’ebé ko’alia kona-ba matéria ne’ebé temi iha númeru anteriór hala’o iha komisaun, la taka dalan ba buat ne’ebé previstu iha kapítulu VII.

Nune’e mós RPN artigu 109 (diskusaun) alínea 1 orienta reprezentante povu sira hala’o diskusaun iha espesialidade foka ba artigu idak-idak, la taka dalan ba buat ne’ebé previstu iha númeru tuir mai.

Alínea 2 hosi RPN artigu 109 hateten, sei laiha diskusaun iha espesialidade ba artigu ida sé la aprezenta proposta alterasaun ruma kona-ba artigu refere.

Purtantu RPN artigo 110 subliña, votasaun iha espesialidade bele foka ba artigu, númeru ka alínea ida-idak hosi proposta-lei orsamentu.

Hafoin termina tiha votasaun sei konvoka kedas artigu 111 (votasaun finál globál) alínea 1 dehan, remata tiha votasaun iha espesialidade iha plenáriu, halo kedas votasaun finál globál.

Alínea 2 hosi artigu 111 ne’e hateten bainhira aprova ona iha espesialidade iha komisaun, haruka testu ba plenáriu hodi halo votasaun finál globál.

Termina tiha votasaun finál sei kontinua konvoka RPN artigu 112 (redasaun finál) alínea 1 esplika, redasaun finál ba proposta-lei ne’ebé aprova ona kompete ba komisaun kompetente ka, sé la’ós komisaun ida de’it mak pronunsia kona-ba matéria ne’e, ba komisaun ida-ne’ebé Prezidente determina, iha prazu máximu loron lima nia laran (maibé bele habadak tanba proposta-lei orsamentu 2020 ho karáter urjénsia tuir matadalan (gião) ne’ebé reprezentante líder bankada sira aprova ona katak debate espesialidade loron 2 de’it).

Alínea 3 hosi RPN artigu 112 ne’e subliña, ramata tiha redasaun finál, haruka textu ne’e ba Prezidente Parlamentu.

Bainhira testu finál hosi proposta-lei ne’e Prezidente Parlamentu Nasionál asina ona sei haruka ba Prezidente Repúblika hodi halo promulgasaun no publikasaun bazeia ba RPN artigu 114.

Tuir obervasaun Agência TATOLI, durante debate jeneralidade deputadu balun la foka prinsípiu no sistema orsamentu maibé ko’alia fali asuntu seluk ne’ebé la relevante ho matéria orsamentu. Nune’e mós lakon tempu barak liu ba diversu sira-ne’ebé la importante.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here