Sidadaun Malázia foto hamutuk staff Emabaixada Malázia sira molok repatria, iha Aeroportu Comoro, sábadu (03/10). Imajen/Air Timor

DILI, 03 outubru 2020 (TATOLI)—Voo repatriasaun ne’ebé organiza hosi Embaixada Malázia iha Timor-Leste ho koordenasaun hosi Air Timor, iha sábadu ne’e repatria sidadaun Malázia na’in-98 hosi Dili bá Kuala Lumpur ho Air Asia.

Aviaun ne’e to’o iha Aeroportu Internasionál Prezidente Nicolau Lobato, Comoro-Dili, iha tuku 13:20.

Prezidente Autoridade Aviasaun Sivíl Timor-Leste (AACTL, sigla portugés), Ana Rosália Ximenes Varella, informa voo hosi Kuala Lumpur lori ema na’in-hitu no hosi Dili bá Kuala Lumpur tula pasajeiru na’in-98.

“Air Asia mai atu hodi recovery aviaun alugadu hosi Programa Ai-han Mundiál (WFP), ne’ebé maka halo ninia voo husi Kuala Lumpur mai Dili iha loron 27 setembru mai Dili, ne’ebé fila la konsege tula pasajeiru tanba hetan problema tékniku,” dehan Ana Rosália ba Agência Tatoli, via telefónika, sábadu ne’e.

Iha sorin seluk, Air Timor agradese Emabaixada Malázia no Governu Timor-Leste ne’ebé suporta hodi realiza voo repatriasaun ne’e.

“Ami-nia agradesementu espesiál ba pasajeiru hotu ne’ebé ho pasiénsia tebes no komprende tebes ami, apezar iha problema tékniku ne’ebé ami hasoru iha loron 26 no 27 de setembru,” refere nota ne’ebé Agência Tatoli asesu hosi Air Timor.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here