Primeiru-Ministru, Taur Matan Ruak. Imajen Tatoli/António Gonçalves

QUELICAI, 03 outubru 2020 (TATOLI)—Koordenadór Unidade Apoiu ba Sosiedade Sivil, Filipe da Costa, heteten Primeiru-Ministru, Taur Matan Ruak, labele marka prezensa iha serimónia inaugurasaun monumentu Saudozu [estátua] Pe. Joăo de Deus Pires, SDB, no misa agradesimentu padrueira Parókia Santa Teresinha Quelicai tanba partisipa diskusaun ba prolongamentu Estadu Emerjénsia (EE) entre deputadu sira iha Parlamentu Nasionál ho Governu.

Notísia Relevante: Sarani Quelicai harii monumentu ba Saudozu Pe. João de Deus Pires

Filipe da Costa hateten, nia parte hakarak aproveita tempu ida-ne’e ho Primeiru-Ministru nia naran husu deskulpa ba sarani sira iha Quelicai tanba Xefe Governu ne’e labele marka prezensa, maibé Primeiru-Ministru lahaluha fó apresiasaun no nia solidária ba sarani Quelicai no sarani Diseze Baucau nian tomak.

Koordenador Unidade Apoiu ba Sosiedade Sivil, Filipe da Costa,. Imajen TATOLI/Domingos Piedade Freitas.

“Ha’u hakarak hatoo de’it mensajen hosi Primeiru-Ministru, Taur Matan Ruak, katak Xefe Governu hakarak fó de’it ninia apresiasaun no solidária ba familia tomak no sarani sira iha Parokia Santa Teresinha Quelicai ninian no sarani sira iha dioseze Baucau tomak,” dehan Filipe da Costa ba Agência TATOLI bainhira tuir selebrasaun misa padrueira Santa Teresinha no Serimónia Inaugurasaun Monumentu Saudozu Pe. João de Deus Prire, SDB, iha Quelicai, sábadu ne’e.

Nia hatutan, tuir Primeiru-Ministru ninia mensajen katak serimónia selebrasaun ida-ne’e ligasaun emosionál tebes ho amu Joăo de Deus Pires tanba nia sai aman ba timoroan barak bainhira hahú ninia misaun ida hanesan saserdote hodi habelar dutrina Maromak nian iha Timor-Leste liuliu iha Parókia Quelicai. Tuir nia, Pe. João de Deus mós hanesan mestre no aman ida-ne’ebé mak hanorin ema barak atu sai matenek no dalabarak nia involve-aan makaas iha rezisténsia liuliu iha rede klandestina.

“Amu Joăo mós apoiu makaas iha tempu rezisténsia nian, nune’e mak ho buat sira-nee hotu merese duni atu Primeiru-Ministru fó ninia apresiasaun tomak ba Pe. João de Deus tanba buat di’ak tomak ne’ebé mak amu Joăo husik hela iha Timor-Leste,” nia haktuir Primieru-Ministru nia lia tatoli.

Jornalista: Domingos Piedade Freitas

Editór: Cancio Ximenes

HAKEREK NO HATÁN

Please enter your comment!
Please enter your name here