Jogador Nagardjo selebra hela golu hafoin liki klube AS Marca.Imajen /Midia Kopa FFTL.

DILI, 02 outobru 2020 (TATOLI)-Ekipa Nagardjo FC, sesta ne’e iha Estádiu Munisipál Dili liki ninia adversáriu AS Marca ho golu 3-1 iha jogu kopa Federasaun Futeból Timor-Leste (FFTL).

Ho rezultadu ne’e maka fó oportunidade ba klube Nagardjo atu hakat ba jogu oitavo finál maske sei falta tan jogu ida hasoru FIEL Fc, enkuantu AS Marca ninia jogu ramata ona.

Bainhira joga hasoru ekipa FIEL FC maka manán ka empata otomatikamente Nagardjo hakat ona ba oitavo finál hamutuk ho klube AS Ponta Leste iha grupu B kompostu husi Atletico Ultramar, FIEL Fc no Nagardjo Fc.

Dadauk ne’e Ponta Leste mak ukun tabela klasifikasaun provizóriu grupu iha B ho pontu 12, Nagardjo Fc 4, Atletico Ultramar 4, FIEL 3 no AS Marca 3.

Golu vitoria Nagardjo prodúz hosi jogadór Rique Alves (19) iha minutu ‘3, Bendito Ximenes (9) ’36, Ricardo Pereira (6) ’90 no golu úniku  AS Marca hatama hosi Pascoal Fernandes (9) ’76.

Jogu ne’e dirije hosi árbitru Fransisco Pereira, Juiz Liña Elisio Lopes, Almerio Baros no árbitru rezerva Emiliano de Araujo.

Jornalista: Hortencio Sanchez

Editór :Agapito dos Santos

HAKEREK NO HATÁN

Please enter your comment!
Please enter your name here