Ministra Negósiu Estranjeiru no Kooperasaun, Adaljiza Albertina Xavier Reis Magno. Imajen Tatoli/António Gonçalves

DILI, 03 outubru 2020 (TATOLI)-Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, apela ba timor-oan sira iha rai-li’ur, bainhira pasaporte mate no hakarak mai Timór liuhosi terrestre la presiza tama ilegál.

“Ba sira ne’ebé pasaporte mate, tuir loloos la presiza hosi jalan tikus (ilegál), sira timor-oan bele liuhosi dalan loloos, ha’u la komprende tanba saida maka sira tenke halai subar maka tama mai,” hateten Ministra Adaljiza, iha ámbitu diskusaun ba pedidu estensaun deklarasaun Estadu Emerjénsia (EE) daneen, iha sala plenáriu Parlamentu Nasionál (PN), sábadu ne’e.

Tuir nia, iha Indonézia bainhira vistu mate, Governu indonéziu fó fleksibilidade.

“Bainhira vistu indonéziu mate, Indonézia fó ona kelonggaran ba atu hela, ba estudante bainhira kartu izin tinggal terbatas (KITAS) mate iha ne’ebá ema prolonga, sira ne’ebé vistu turista mate ba selu de’it ema bele estende,” Ministra fó hanoin.

Notísia Relevante: PM rekoñese dezafíu iha fronteira terrestre

Governante ne’e ko’alia lia hirak ne’e tanba sidadaun sira kontinua tama hosi fronteira terrestre liuhosi dalan ilegál, hosi fulan agustu to’o setembru ema na’in-390 maibé konsege submete hotu ba kuarentena obrigatóriu.

Nia dehan, kona-ba estudante sira iha rai-li’ur, liuliu iha Indonézia to’o agora país ne’e seidauk fó vistu ba ema.

“Indonézia fó de’it vistu ba ema moras maibé ita tenke lobi maka’as, tenke autorizasaun hosi sira-nia ospitál no hosi junta médika,” nia akresenta.

Membru ezekutivu ne’e hatutan: “Ba estudante sira-ne’ebé vistu mate laiha problema no KITAS mate bele ba fronteira mós husik tama.”

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here