Ministra Negósiu Estranjeiru no Kooperasaun, Adaljiza Albertina Xavier Reis Magno. Imajen Tatoli/Egas Cristovão

DILI, 03 outubru 2020 (TATOLI)–Ministra Negósiu Estranjeiru no Kooperasaun, Adaljiza Albertina Xavier Reis Magno, hateten atu hetan vistu hodi Ministériu Saúde (MS) liuhosi Ospitál Nasionál Guido Valadares (HNGV, sigla portugés) haruka timor-oan halo tratamentu saúde iha ospitál rai-li’ur susar iha situasaun pandemia COVID-19, maibé Governu nafatin tenta rezolve.

“Ita-nia sidadaun bainhira halo tratamentu iha rai-liur, atu hetan vistu susar tebes, bá Indonézia tantu Malázia. Uluk Indonézia kuandu taka tomak no Malázia, ami lobi maka’as to’o ita-nia Embaixadora iha Malázia foti liman tanba iha ekipa task force ba prevensaun COVID-19 ita lobi la hetan. Maibé ami buka meiu oinoin to’o ha’u atu foti de’it ona telefone ko’alia maibé to’o ikus ami hetan duni dalan ida tanba ami koñese diplomata balun ne’ebé bele influénsia ekipa task force,” informa Ministra Adaljiza, iha ámbitu diskusaun ba pedidu estensaun deklarasaun Estadu Emerjénsia (EE) daneen, iha sala plenáriu Parlamentu Nasionál (PN), sábadu ne’e.

Notísia Relevante: Durante EE, MS transfere pasiente 11 ba rai-liur

Nia dehan, Governu buka meiu hotu maibé iha situasaun ne’e difísil tanba nasaun hotu halo protesaun maka’as ba sira-nia rain.

“Junta médika foti desizaun no óspital fó dalan ona atu pasiente bele halo tratamentu iha rai-li’ur, maibé ekipa task force rai-li’ur maka susar tebes maibé ikus mai iha dalan,” nia akresenta.

Iha fatin hanesan, Ministra Saúde, Odete Maria Freitas Belo, informa durante prevensaun COVID-19, MS sempre fó atensaun ba pasienste sira ne’ebé maka haruka ba rai-li’ur.

Ministra Saúde, Odete Maria Freitas Belo. Imajen Tatoli/Egas Cristovão

Durante períodu EE, MS konsege haruka pasiente na’in-12 halo tratamentu saúde ba moras ne’ebé HNGV labele halo tratamentu tanba rekursu.

“Pasiente ami haruka halo tratamentu iha Indonézia no Malazia ba moras kankru. Haruka pasiente 12 ne’e la’ós hanesan situasaun bain-bain tanba presiza hetan aseitasaun hosi parte rua, tanba país sira ne’e iha ekipa task force COVID-19,” Ministra akresenta.

Dalaruma ospitál aseita ona maibé hosi imigrasaun dehan tenke hein aseitasaun.

“Bainhira aseita ona husu fali ba task force maka la aseita, ida-ne’e maka ami-nia problema atu lori sai pasiete sira ba rai-li’ur tenke hetan karta aseitasaun hosi parte sira hotu maka bele lori pasiente,” nia haktuir.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here