Ministra Negósiu Estranjeiru no Kooperasaun, Adaljiza Albertina Xavier Reis Magno. Imajen Tatoli/Egas Cristovão

DILI, 03 outubru 2020 (TATOLI)–Ministériu Negósiu Estranjeiru no Kooperasaun (MNEK) durante estensaun Estadu Emerjénsia (EE) ligadu ho pandemia COVID-19, simu pedidu hosi empreza balun atu normaliza voo komersiál kada fulan dala-ida, maibé pedidu hirak Governu sei analiza didi’ak molok deside.

Tuir Ministra Negósiu Estranjeiru no Kooperasaun, Adaljiza Albertina Xavier Reis Magno, proposta hirak ne’e sei haree hafoin bele autoriza tanba daudaun númeru propagasaun vírus iha país seluk kontinua aas.

“Iha pedidu hosi kompaña balun atu normaliza atividade aviaun komersiál fulan-ida dala-ida maibé ami sei estuda hela tanba desizaun ne’e la’ós mai hosi MNEK de’it maibé tenke envolve mós Ministériu Saúde, Ministériu Interiór, inklui Ministériu Transporte no Komunikasaun,” hateten Ministra Adaljiza, iha ámbitu diskusaun pedidu estensaun deklarasaun EE daneen, iha sala planáriu Parlamentu Nasionál (PN), sábadu ne’e.

Notísia Relevante: Hahú Ohin, AACTL Suspende Temporáriu Operasaun Komersiál Internasionál

Governante ne’e dehan, pedidu ne’e sei iha negosiasaun nia laran no ikus maka deside maibé karik autoriza duni ba fulan-ida dala-ida.

“To’o agora seidauk iha komersiál semo mai territóriu nasionál, aviaun sira mai ne’e maioria aviaun ne’ebé maka ema aluga no Governu fasilita, ezemplu hanesan AeroAtlantic hosi Portugal,” nia akresenta.

Aleinde ne’e, aviaun ne’ebé tama Timor-Leste maka Malaysia Airlines liuhosi programa voo umanitáriu ne’ebé aluga hosi Programa Ai-han Mundiál (WFP, sigla inglés), ne’ebé tun ona iha Aeroportu Internasionál Prezidente Nicolau Lobato, Comoro, dala-10 hodi lori traballadór umanitáriu no iha instituisaun Estadu iha situasaun krize inklui ekipamentu hosi ministériu no instituisaun sira seluk.

“Ita hetan kouta ema sanulu semana rua-rua, ami fó prioridade ba ema moras ne’ebé mak atu ba halo tratamentu iha rai-liur no asesór sira ne’ebé maka Governu presiza. Ami fó prioridade bazeia ba proposta ne’ebé sira hatama ba MNEK,” nia informa.

Iha fulan agostu no setembru 2020, totál aviaun charter ho voo hamutuk dala-80, lori ema hamutuk 1.600, no karga kuaze tonelada 600 ne’ebé mai hosi Xina-Dili, Darwin-Dili, Bali-Kupang-Dili, Manila-Dili, Kuala Lumpur-Dili, Korea-Dili, no ida mai hosi Portugál.

Iha loron 04 abríl 2020, MTK liuhosi Autoridade Aviasaun Sivíl Timor-Leste (AACTL) suspende provizóriu voo internasionál.

Maski Governu deside suspende operasaun internasionál, maibé kona-ba kestaun nesesidade emerjénsia hanesan lori ai-moruk husi li’ur no asuntu emerjénsia seluk hanesan evekua sidadaun iha rai-li’ur mai iha rai-laran sei nafatin la’o, tanba ne’e Aeroportu no Navegasaun Aéreu Timor-Leste (ANATL)  loke aeroportu Comoro nune’e bele responde ba kestaun nesesáriu.

Suspensaun temporáriu ba operasaun komersiál internasionál (designated and charter) ba aviaun ne’ebé durante ne’e halo operasaun mai Timor-Leste ho rute Denpasar-Dili-Denpasar, Kupang-Dili-Kupang, Darwin-Dili-Darwin no Singapura-Dili-Singapura.

Jornalista: Antónia Gusmão

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here