Diretór Nasionál Empregu Esteriór SEFOPE, Filomeno Soares. Imajen Tatoli/Joanico de Araújo

DILI, 03 outobru 2020 (TATOLI)—Ema deskoñesidu tenta atu sunu dokumentu aplikasaun ba vaga Seasonal Worker Programme (SWP) tinan 2019 hosi munisípiu Dili, ne’ebé rai iha edifísiu Sekretaria Estadu Formasaun Profisionál no Empregu (SEFOPE) Becora no akontesimentu ne’e iha sesta (02/10) maizumenus tuku 05:00 madrugada.

“Laiha dokumentu importante balun ne’ebé ema tenta sunu, maibé dokumentu horiseik tenta sunu maka dokumentu aplikasaun timor-oan ne’ebé aplika ba vaga SWP iha tinan kotuk nian. Agora daudaun sira tuir teste,” informa Diretór Nasionál Empregu Esteriór SEFOPE,  Filomeno Soares ba Agência Tatoli, via telefónika sábadu ne’e.

Diretór Nasionál ne’e konfirma, akontesimentu ne’e ladún grave tanba hetan salva lalais hosi komunidade sira ne’ebé hela besik.

“Ema deskoñesidu tenta sunu duni maibé konsege salva tanba pesoál seguransa sivíl sira, ne’ebé maka iha ne’ebá, kuru bee ba fakar halo mate ahi no buat hotu la’o di’ak hela, laiha problema. Motivu hosi sunu ne’e rasik  ita seidauk hatene tanba saida maka mosu,” nia tenik.

Notísia Relevante: Kandidatu Traballadór timor-oan na’in-900 ba Austrália tuir teste fíziku

Dirijente ne’e dehan, dokumentu sira ne’ebé horseik ahi han, halo ona selesaun no hatama hotu ona ba sistema baze dadus.

“Maski akontese maibé aplikante sira -nia naran tama hotu ona baze dadus no agora sira tuir teste, tanba ne’e laiha problema. Aleinde ne’e, iha mós  livru manuál balun hosi traballadór SWF ne’ebé maka mai rai iha ne’ebá,” nia akresenta.

Ema deskoñesidu ne’e tenta sunu armajen rai dokumentu sira.

“Fatin ne’e durante ne’e seguru, leten  iha Curiculum Vitae (CV) no dokumentu seluk ne’ebé ema ne’e sunu, maibé ahi foin han oituan de’it komunidade sira hamutuk ho seguransa rega no horiseik ha’u konsege haruka kompañia ne’ebé reabilita fatin ne’e hodi taka metin armajen,” nia hatutan.

Hafoin akontesimentu, Diresaun Nasionál Empregu Esteriór halo ona relatóriu hodi hato’o ba superiór SEFOPE.

“Kazu ne’e ami halo relatóriu,  konsege fó hatene ba seguransa sivíl sira iha edifísiu SEFOPE Becora tanba sira-nia responsabilidade, hafoin ha’u bolu kolega sira hodi orienta kompañia kontratór halo kedan moru haleu fatin ne’e no hola kalen solda fatin halo metin,” nia realsa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here