Primeiru-Ministru, Taur Matan Ruak, hamutuk ho membru Governu sira defende Proposta OJE 2020 iha debate faze jeneralidade ba loron daruak, iha sala plenáriu PN, sesta (02/10). Imajen Tatoli/Egas Cristovão

DILI, 02 outubru 2020 (TATOLI)-VIII Governu Konstitusionál daudaun foku hela iha polítika reforma iha área hanesan administrasaun públika, lejizlativa, desentralizasaun, finansa públika no institusionál.

Maski nune’e, Primeiru-Ministru (PM), Taur Matan Ruak, hateten atu implementa reforma sira ne’ebé mak sai ona prioridade Governu la fásil no presiza fatór importante rua.   

“Governu ida troka Governu ida tama mai, hotu-hotu ko’alia reforma, maibé reforma ne’e la’ós fásil. Ita iha fatór rua hanesan infleksibilidade psikolójika, haree ba komportamentu no maneira hanoin no seluk maka infleksibilidade polítiku no prosesuál, haree ba ábitu ne’ebé ita iha burokraterizasaun kona-ba polítiku sira, tanba ita toman ona no bainhira atu muda ne’e susar tebes,” hateten Xefe Governu iha diskusaun Proposta Orsamentu Jerál Estadu (OJE) 2020 iha faze jeneralidade ba loron daruak, iha sala plenáriu, Parlamentu Nasionál (PN) sesta ne’e.

Tanba ne’e, Xefe Ezekutivu dehan, Governu bele fó kontribuisaun maibé presiza apoiu másimu hosi PN.

“Signifika katak lei barak mak tenke mai iha Parlamentu, tanba ne’e presiza tebes deputadu sira nia apoia hodi aprova lei sira,” nia akresenta.

Iha reforma administrasaun públika, Governu aprova ona programa ba períodu tinan 2019 to’o 2023 no estabelese mekanizmu akompañamentu atu transforma administrasaun públika ne’ebé haree liubá estrutura no podér sentrál.

Reforma ne’e hakarak haklean prosesu prestasaun serbisu, fortalese responsabilidade no insentivu dezempeñu, hadi’a jestaun no dezenvolvimentu rekursu umanu, revee funsaun no estrutura administrasaun públika inklui hadi’a servisu administrativu sira ne’ebé presta ba sidadaun no empreza sira.

Nune’e mós, atu halo monitorizasaun ba implementasaun programa reforma ne’e maka Governu kria ona komisaun interministeriál ba akompañamentu, ne’ebé prezide hosi Ministru Prezidénsia Konsellu Ministru no sei integra ministru inkluo entidade relevante sira iha matéria ne’e.

Kona-ba reforma lejizlativa, hanesan inisiativa Governu atu ajuda simplifika lei hodi apoia aselera objetivu dezenvolvimentu.

Enkuantu reforma desentralizasaun, Governu sentrál sei fó kompeténsia no podér ba instituisaun sira iha munisípiu atu hakbesik Estadu no Governu ba populasaun.

Reforma finansa públika ho hanoin nasaun labele depende ba reseita husi fundu petrolíferu no ba inisiativa ne’e Governu halo esforsu rekolla reseita sira no ko’a gastu ne’ebé ladún nesesáriu hodi konsetra ba nesesidade importante liu no fundamentál tuir dezenvolvimentu no rekorre ba fonte finasimentu seluk.

Ikus liu, ba reforma institusionál ho objetivu komun atu hadi’a jestaun no funsionamentu setór públiku, nune’e asegura katak Estadu funsiona iha kuadru legalidade no seguransa jurídika efetiva ho dalan ne’ebé efisiente no efikáz.

Atu halo reforma institusionál, Governu kria ona komisaun koordenasaun no akompañamentu reforma institusionál ne’ebé kria ho baze rezolusaun Governu ho númeru 29/2020, 19 agostu ho  objetivu atu halo koordenasaun ka sai subriña atu tau-matan ba prosesu reforma hotu ne’ebé mak la’o iha Governu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here