Reitor Unital, Florindo Pereira. Imajen Egas Cristovão

DILI, 02 outobru 2020 (TATOLI)-Magnífiku Reitór Universidade Orientál Timor Lorosa’e (UNITAL), Florindo Pereira, informa daudaun ne’e halo hela diskusaun ba prosesu inskrisaun ba estudante foun tinan akadémiku 2020-2021.

Maski seidauk iha desizaun finál atu simu estudante foun na’in hira iha tinan ne’e, Reitór UNITAL ne’e adianta uluk ona katak posibilidade bele simu estudante foun hamutuk rihun ida.

Notísia Relevante :UNPAZ sei simu estudante foun 1.500 iha 2020

“Ha’u pesoalmente hakarak tinan ne’e bele hatun ba rihun ida atu nune’e espasu sira seluk ne’e ita bele utiliza fali ba laboratóriu hanesan ba fakuldade enjinária no saúde atu nune’e sira bele iha teoria no mos prátika,” dehan nia ba Tatoli iha ninia servisu fatin Kampus UNITAL Becora, sesta ne’e.

Nia hateten agora daudaun senadu UNITAL sira halo hela diskusaun kona-ba prosesu simu estudante foun no mós halo avaliasaun ba dezafiu no susesu ne’ebé maka fakuldade sira seidauk atinje no atinje ona iha tinan kotuk hodi hadi’a di’ak liután ba futuru.

“Ita atu aumenta númeru estudante foun ka lae presiza haree mós orsamentu no mós depende ba impaktu husi tinan kotuk ne’e rezultadu ne’e pozitivu  ka negativu,” nia hateten.

UNITAL sei fó sai orariu simu estudante foun iha tempu badak hafoin senadu universidade nian finaliza ona prosesu diskusaun ne’e.

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here