Parlamentu Nasionál. Imajen Tatoli/António Gonçalves.

DILI, 02 outubru 2020 (TATOLI)–Primeiru-Ministru (PM), Taur Matan Ruak, hateten seidauk iha istória Timór nian Governu ida halo ona ezekusaun Orsamentu Jerál Estadu (OJE) atinje porsentu 100.

Xefe Governu ko’alia asuntu ne’e hodi hatan preokupasaun membru Parlamentu Nasionál (PN) iha diskusaun Proposta OJE 2020 iha faze jeneralidade, ne’ebé dehan Governu husu orsamentu boot maibé sei labele ezekuta hotu.

“Kona-ba orsamentu boot, loos duni katak orsamentu ne’e boot maibé ita dezagrega no haree katak bele ezekuta. Naturalmente ita-nia istória seidauk iha Governu ida konsege ezekuta orsamentu to’o porsentu 100, maibé sufisiente atu responde nesesidade tuir buat ne’ebé ita planea ona,” dehan PM iha sala plenáriu, sesta ne’e.

Notísia Relevante: Xefe Governu prefere ezekusaun orsamentu ho kualidade

Nia argumenta, orsamentu boot la’ós ambisaun no demaziadu, tanba haree ba despeza millaun $708 hanesan despeza regular Governu iha novembru no iha dezembru millaun $136.

Iha tinan ne’e, Governu iha despeza ba rekuperasaun ekonómika presiza millaun $103, pagamentu kombustível no manutensaun sentrál elétrika millaun $80, fundu infraestrutura millaun $75, pagamentu ba projetu sira Ministériu Obra Públiku millaun $56, Zona Ekonomia Espesiál Sosiál Merkadu (ZEESM) millaun $76, pagamentu kontribuisaun seguransa sosiál millaun $13, pagamentu saláriu désimu terseiru més millaun $17.

Nune’e mós, kapitál dezenvolvimentu liña ministériu millaun $10, subsídiu ba partidu polítika sira millaun $6, Planu Diretór Munisipál (PDM) millauun $4-resin, igreja millaun $5, pagamentu ba taxa millaun $4, pagamentu ba Ró Nakroma segundu millaun $6-resin, Banco Nacional de Comércio de Timor-Leste (BNCTL) millaun $5, no empréstimu millaun $60.

“Ha’u la temi despeza kiik sira, pur tantu orsamentu ne’e aloka ba fatin ne’ebé presiza gasta no ita haree boot loos duni, maibé kuandu fahe kiik-oan prátikamente bele halo ninia ezekusaun,” nia realsa.

Iha Fatin hanesan, Deputada bankada Congresso Nasionál da Reconstrucão de Timor  (CNRT), Virgínia Ana Belo, konsidera Proposta OJE 2020 la reflata programa Governu nian.

“Ha’u hakarak haree ba kapasidade ezekusaun OJE, Primeiru-Ministru dehan ezekusaun lasai sasukat, entaun osan ne’ebé iha tenke ezekuta,” nia dehan.

Tuir Deputada opozisaun ne’e, haree ba sustentabilidade fiskál ho orsamentu ne’ebé kada tinan Governu foti liu Rendimentu Sustentabilidade Estimadu (RSE), bele ameasa ba sustentabilidade fiskál.

Proposta OJE 2020 hamutuk biliaun $1,497 no foti liu RSE hamutuk millaun $416,5 no bainhira orsamentu la’o ho normál ezekusaun ne’e sei efetivu iha fulan novermbru no dezembru.

Hahú janeiru to’o agora Governu rekorre ba Dotasaun Orsamentu Temporáriu (DOT) no ezekusaun to’o 31 agostu 2020 atinje ona montante millaun $600,4  no sei iha balansu millaun $896,7 hosi totál tetu biliaun $1,497.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here