Xefe Bankada FRETIlIN, Francisco Miranda Branco. Imajen/Egas Cristovão

DILI, 02 setembru 2020 (TATOLI)—Bankada Frente Revolusionária Timor-Leste Independente (FRETILIN) iha uma fukun Parlamentu Nasionál afirma, rezultadu entendimentu palataforma hosi partidu FRETILIN, PLP no KHUNTO lori esperansa iha proposta Orsamentu Jerál Estadu (OJE) 2020.

Liuhosi deklarasaun polítika, Xefe Bankada FRETILIN Deputadu Francisco Miranda Branco, konsidera momentu ida ohin importante tebes ba estadu nia vida, materializa rohan ba impase polítika iha rai-laran ne’ebé afeta tebes ba povu nia moris, ekonomia no setór privadu sira tanba konsege hakat liu impase polítiku.

“Bankada FRETILIN apresia no louva VIII Governu Konstitusionál ne’ebé sustenta hosi plataforma entendimentu PLP, KHUNTO ho FRETILIN, tanba liuhosi diálogu permanente, sériu no responsável bele hakotu impase polítika no lori naroman ho esperansa foun ba Povu doben Timor-Leste. Rai ne’e ita hotu nian,” deklarasaun polítika bankada FRETILIN iha Parlamentu Nasionál, iha debate faze jeneralidade loron daruak (loron ikus), sesta ne’e.

FRETILIN louva VIII Governu Konstitusionál, nia dehan, tanba biar ho de’it Dotasaun Orsamentál Temporária (DOT) maibé Primeiru-Ministru, Taur Matan Ruak, konsege halo jestaun di’ak ba prevensaun no kombate COVID-19 hodi proteje sidadaun tomak tanba laiha transmisaun lokál.

Bankada FRETILIN fiar VIII Governu komprometidu ho prátika boa governasaun ho seriedade, plataforma entendimentu iha fulan tolu de’it, aprova Lei Medida Prevensaun no Kombate Korrupsaun (MPCC-sigla portugés) ne’ebé Prezidente Repúblika promulga ona.

Ho nune’e, liutiha tinan sanulu-resin konsiderada hanesan Estadu frájil iha fulan tolu de’it ho Rejime Duodesimál hasoru tan COVID-19. Maibé ho interese komún, iha solidariedade institusionál no respeitu ba separasaun podér, órgaun soberanu sira, instituisaun Estadu no povu tomak ho medida no polítika sériu, hamutuk konsege hasai RDTL hosi grupu Estadu frajil bazea ba relatóriu Organizasaun ba Kooperasaun no Dezenvolvimentu Ekonómiku (OCDE-sigla portugés), iha loron 18 fulan-setembru 2020.

“Plataforma entendimentu sei aprova duni OJE 2020 no osan Fundu Minarai iha Banku Federál Amérika mai daudaun hela no sei mai nafatin tanba osan ne’e Estadu Timor-Leste nian, la’ós ema ida ka grupu no família ida-nian,” nia hateten.

Nia haktuir, fundu minarai ne’e polítika ida hosi Governu Konstitusionál dahuluk nian nu’udar rekursu ida hodi hasa’e ekonomia, hamenus ki’ak no mós nu’udar kompromisu ida ba transferénsia vida ekonómika sustentável, hosi jerasaun ida ba jerasaun seluk.

Tanba ne’e, Orsamentu Jerál Estadu nian tenke benefísia duni povu tomak, la’ós atu benefísia de’it ba elite ka grupu ki’ik-oan ida ho sira-nia interese. Maibé, bele hadi’a kualidade moris povu tomak nian no hasa’e povu nia produtividade, hatuur hikas Maubere iha sentru ba polítika dezenvolvimentu iha Timor-Leste.

Tanba ne’e, nia dehan, Bankada FRETILIN hakarak apela ba reprezentante povu iha uma fukun, atu tau aas liu interese povu nian bainhira tama ba debate iha espesialidade OJE 2020.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here